Alty boksshy el birinshiligine qatysqan joq - Aıtjanov
ASTANA. QazAqparat - Bokstan Shymkent qalasynda ótip jatqan el birinshiligine ulttyq quramanyń alty boksshysy qatyspaıdy. Bul týraly QazAqparat tilshisine bas bapker Myrzaǵalı Aıtjanov aıtyp berdi.
«Shymkentte keshe bastalǵan el birinshiligi óte tartysty ótip jatyr. Barlyq oblystyń bylǵary qolǵap sheberleri myqty daıyndyqpen kelgeni kórinip tur. Naǵyz myqtylar sanaýly kúnde belgili bolady. Biraq ulttyq quramada ótken jyldan beri el namysyn qorǵap kele jatqan alty boksshy el birinshiligine qatyspaıdy. Sebebi olar osydan eki aı buryn ǵana Germanııanyń Gambýrg qalasynda uıymdastyrylǵan álem chempıonatynda bar kúsh-jigerin sarqyp, elge medal syılady. Abyroıymyzdy asyrdy. Jekpe-jek barysynda jaraqat aldy. Olar qazir ózderine em-dom alyp, qysqa merzimge demalys alǵan. Sondyqtan el birinshiliginen bosatyldy», - dep atap ótti bas bapker.
Esterińizge sala keteıik, Gambýrg qalasynda ótken álem chempıonatynda 49 kelide Jomart Erjan, 69 kelide Abylaıhan Júsipov, 91 kelide Vasılıı Levıt qola júldeger atansa, 75 kelide Ábilhan Amanqul, +91 kelide Qamshybek Qońqabaev kúmis júldeger atansa, 56 kelide Qaırat Eralıev álem chempıony atanǵan edi.
