Alty balanyń anasyn ólimshi qylyp sabaǵan kúdikti qamaýǵa alyndy

ALMATY. QazAqparat - Áleýmettik jelide 6 balanyń anasyn zorlamaq bolǵan jáne ólimshi qylyp sabaǵan adamnyń bostandyqta júrgeni týraly jazba jarııalanǵan bolatyn. Osy oqıǵaǵa baılanysty Almaty oblystyq Polıtsııa basqarmasy túsindirme berdi, dep habarlaıdy QazAqparat.

«Aǵymdaǵy jyldyń 27 qyrkúıeginde Qarasaı aýdany PB kezekshi bólimine Qarasaı aýdany Qaskeleń qalasy aýrýhanasynyń reanımatsııa bólimine 35 jastaǵy áıeldiń túskeni týraly aqparat tústi. Bul derek Qylmystyq Kodekstiń 106-babynyń 1-bóliminde kózdelgen qylmystyq quqyq buzýshylyq belgileri boıynsha Qarasaı aýdanynyń PB-da tirkeldi. Júrgizilgen jedel-izdestirý is-sharalarynyń nátıjesinde 23 jastaǵy kúdikti Qarasaı aýdanynyń PB-ǵa jetkizildi», - dep jazdy vedomstvodan.

Ondaǵy málimetterge qaraǵanda, qazirgi ýaqytta qylmystyq is boıynsha tolyqtyǵy men jan-jaqtylyǵyn qamtamasyz etýge baǵyttalǵan barlyq qajetti tergeý áreketteri júrgizilýde.

Aıta keteıik, osy ýaqytqa deıin aımaqta Antıkor qyzmetkerin qorqytqan polıtsııa maıory qamaýǵa alynǵanyn jazǵan bolatynbyz.