Alty aıda koronavırýspen kúres sharalaryna 135 mlrd teńge jumsalǵan
NUR-SULTAN. QazAqparat - Koronavırýstyń aldyn alý, dıagnostıkalaý jáne emdeýge, sondaı-aq epıdemııaǵa qarsy is-sharalarǵa qatysqany úshin medıtsına qyzmetkerlerine ústemeaqy tóleýge áleýmettik medıtsınalyq saqtandyrý qoryna 154,7 mlrd teńge bólindi. Bul jóninde qordyń baspasóz qyzmetine silteme jasap QazAqparat habarlaıdy.
Bıylǵy naýryz-qyrkúıek aılary aralyǵynda 135,6 mlrd teńge tólendi. Shyǵynnyń basym bóligin, ıaǵnı 81,3 mlrd teńgeni epıdemııaǵa qarsy is-sharalarǵa tartylǵan medıtsına qyzmetkerleriniń jalaqysyna ústeme qurady.
«Densaýlyq saqtaý mınıstrligi ortalyq deńgeıde jáne jergilikti atqarýshy organdar koronavırýstyń yqtımal ekinshi tolqynyna daıyndyq jumystaryn jalǵastyrýda. Óz kezeginde Qor koronavırýs pen pnevmonııamen aýyratyn naýqastarǵa kórsetiletin medıtsınalyq kómektiń ýaqtyly tólemin júrgizedi. Bul rette, osy aýrýlarmen aýyratyn patsıentterge medıtsınalyq kómek MÁMS júıesindegi saqtandyrylý mártebesine qaramastan kórsetiledi»,-dep habarlaıdy ÁMSQ baspasóz qyzmeti.
Naýryzdan qyrkúıekke deıin provızorlyq jáne karantındik statsıonarlarǵa emdeýge jatqyzýdy qarjylandyrýǵa 24,5 mlrd teńgeden astam qarajat jumsaldy, olarda karantındik oqshaýlaý jáne qajet bolǵan jaǵdaıda 240 myńnan astam adam emdeldi.
Osy kezeńde ınfektsııalyq statsıonarlarda 72 myń patsıent emdeldi. Covid-19 jáne koronavırýstyq pnevmonııamen aýyratyn naýqastardy ambýlatorııalyq jáne statsıonarlyq jaǵdaıda emdeýge barlyǵy 18,8 mlrd teńge jumsaldy.
Úıdegi statsıonardyń medıtsınalyq qyzmetterine aqy tóleý úshin 9 mln teńge jumsaldy. Úıde emdeýdi ókpe 30% - dan aspaǵan kezde aýrý aǵymynyń jeńil túri bar patsıentter alady. Kún saıyn ýchaskelik dárigerler olardyń jaǵdaıyn baǵalaý úshin qońyraý shalady, kem degende úsh kúnde bir ret beıne keńes beriledi, qajetti rásimder de kórsetiledi. Eger jaǵdaı nasharlasa, mysaly, úsh-bes kún ishinde temperatýra tómendemese, tynys alý jáne tahıkardııa joǵarylaıdy, naýqas aýrýhanaǵa jatqyzylady. Bul qyzmetter osy jyldyń shilde aıynan bastap halyqqa qoljetimdi boldy.
Sol kezeńnen bastap mobıldi brıgadalar jumysyn bastady. Olardyń qyzmetterin tóleý úshin shildeden qyrkúıekke deıin Qor 1 mlrd teńgeden astam qarajat baǵyttady. Emhananyń árbir shaqyrýy úshin 5400 teńgeden alady, osylaısha úsh aıda 190 myńnan astam shyǵý oryndaldy. Mobıldi brıgadanyń quramyna dáriger jáne / nemese medbıke, keıde beıindi maman kiredi. Mobıldi brıgadalar patsıentti alǵashqy qarap-tekserýdi júrgizedi, onyń jaı-kúıiniń aýyrlyq dárejesin baǵalaıdy, Sovid-19 sımptomdary bolǵan kezde PTR-testke materıal alady, pýlsoksımetrııa júrgizedi, kórsetilimderi kezinde rentgenografııaǵa nemese kompıýterlik tomografııaǵa joldama bere alady, dárilik zattardy taǵaıyndaı alady. Aıta ketý kerek, óńirlerde osyndaı 3000-nan astam brıgada qurylǵan.
PTR dıagnostıkasyn júrgizýge 19 mlrd teńgeden astam qarajat bólindi. Naýryzdan qyrkúıekke deıin júrgizilgen testileý úshin Qor 10,7 mlrd teńge tóledi. PTR-testileýden elimizdiń statsıonarlarynda 222 024 qazaqstandyq, ambýlatorııalyq jaǵdaıda - 708 124 adam ótti.
Medıtsınalyq saqtandyrý qory tóleıtin qyzmetterdiń sapasyn joǵarylatý úshin patsıentter shaǵymdarmen jáne usynystarmen 1406 baılanys ortalyǵyna júginip, sondaı-aq olardy Qoldau 24/7 mobıldi qosymshasynda qaldyra alady.
