Alty aıda elimizdegi tirkelgen qylmystar deńgeıi 70, onyń ishinde aýyr qylmystar 22,1 paıyzǵa ósti
ASTANA. 11 shilde. QazAqparat - Aǵymdaǵy jyldyń alty aıynda elimizdegi tirkelgen qylmystar deńgeıi 70, onyń ishinde aýyr qylmystar 22,1 paıyzǵa ósken.
Bul aqparatty QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń baspasóz qyzmeti taratyp otyr.
2012 jyldyń 6 aıy ishinde elimizdegi tirkelgen qylmystar deńgeıi ótken jyldyń osyndaı kezeńimen salystyrǵanda 70 (80 685-ten 137 151-ge), onyń ishinde aýyr qylmystar 22,1 paıyzǵa (12 762-den 15 578-ge) ósken. Qylmystyń bulaısha ósýi jylpy alyp qaraǵanda túsinikti, óıtkeni olar buryn dástúrli túrde jasyrylyp kelgen qylmystar esebinen bolyp otyr. Máselen, urlyq 91,8 paıyzǵa (44 550-den 85 443), buzaqylyq 119,1 paıyzǵa (3 615-ten 7 922-ge), alıaqtyq 69,7 paıyzǵa (5 721-den 10 037-ge), tonaý 39,6 paıyzǵa (7 363-ten 10 279) artqan.
Vedomstvonyń atap ótýinshe, qylmystardyń bul túrleri jalpy tirkelgen qylmystylyqtyń negizgi bóliginiń 83 paıyzyna teń. Qylmystardyń quramyndaǵy asa aýyr qylmystar úlesi - 1,2 paıyzdy (1 703), aýyr qylmystar - 11,4 paıyzdy (15 578), aýyrlyǵy ortasha qylmystar - 79,4 paıyzdy (108 884), aýyr emes qylmystar 8 paıyz (10 986) qurady.
«Jalpy qylmystylyqtyń ósýi elimizdiń barlyq óńirlerinde baıqaldy, bul Bas prokýratýra men Іshki ister mınıstrliginiń esepke alý-tirkeý tártibin, qylmystardy esepke alýda tolyqtyq pen ashyqtyqty kúsheıtýde tıimdi sharalar qoldanyp, qylmystar týraly aryzdar men habarlamalardy tirkeýdiń birtutas júıesin engizýimen túsindirýge bolady» - delingen habarlamada.
