Alty aıda Astanada zańsyz qoqys tókken 28 júk kóliginiń júrgizýshisi jaýapkershilikke tartyldy
ASTANA. QazAqparat - Zańsyz qoqys oryndary elordanyń ekologııalyq jaǵdaıyna keri áser etedi. Turaqty túrde ótkiziletin reıdter qoqys tastaǵan tártip buzýshylardy anyqtaýǵa múmkindik beredi, dep jazady qalanyń resmı saıty.
Búgin komıssııalyq reıd barysynda eń aldymen Royal Park City qalashyǵynyń qurylys aýmaǵy tekserilip, jınalyp qalǵan qoqys úıindisi tabyldy. Astana qalasynyń tabıǵı resýrstar jáne tabıǵat paıdalanýdy retteý basqarmasy basshysynyń orynbasary Sáken Isaevtyń aıtýynsha, jer paıdalanýshy óz ýchaskesiniń sanıtarlyq jaǵdaıyn baqylaýǵa tıis, aýmaq kúzetilip, nysanaly maqsatta paıdalanylýy kerek. Sonymen qatar, atalǵan aýmaqta suıyq turmystyq qaldyqtar tógetin assenızatorlyq mashına turǵan. Tártip buzýshyǵa 20 AEK, ıaǵnı, 42 420 teńge mólsherinde aıyppul salyndy.
«Reıd sharalary úsh aptadan beri ótkizilip keledi. Oǵan birqatar tulǵalar tartyldy. Biz Astana qalasynyń «Esil» aýdany aýmaǵyndamyz. Bul jeke menshikti jer, ákim apparatymen Astana qalasy boıynsha ekologııa departamentine odan ári tirkeý úshin úndeý joldanady. Atalǵan kásiporyn iri kásipkerlik sýbektisine jatady, oǵan 200 AEK mólsherinde aıyppul salynady, qysqa merzimniń ishinde atalǵan buzýshylyqty joıý týraly uıǵarym shyǵarylady», - deıdi Astana qalasy boıynsha ekologııa departamenti basshysynyń orynbasary Mansur Oshýrbaev.
«ıÝjnyı» garajdar kooperatıvi mańynda, Toqpanov kóshesiniń boıynda ornalasqan qurylys obektisine tıesili aýmaqtan da jınalǵan qoqys tabyldy. Qurylys kompanııasy ákimshilik jaýapkershilikke tartylyp, buzýshylyqty joıý úshin ýaqyt beriletin boldy. Eger fırma qoqysty jınamaıtyn bolsa, ol qaıtadan jaýapkershilikke tartylmaq.
Reıd barysynda tekserilgen úshinshi nysan - Astana Mall saýda, oıyn-saýyq ortalyǵynyń janynda salynyp jatqan turǵyn úı kesheniniń qurylys aýmaǵy.
«TemirRemStroıServıs» JShS bir aptadan artyq ýaqyt boıy qurylys aýmaǵyndaǵy qoqysty shyǵarmaǵan. Abattandyrý erejelerine sáıkes qurylys-montajdaý jumystarynan keıin jınalǵan qoqysty shyǵarý kún saıyn kún batqansha júrgiziledi. Qurylys uıymy qatty turmystyq qaldyqtar men qurylys materıaldaryn kómý úshin qoqys aýmaǵyna, ekopolıgonǵa shyǵarýǵa mindettenedi», - deıdi Astana qalasynyń «Almaty» aýdany ákimi apparaty abattandyrý bóliminiń basshysy Ramıl Dosmaǵanbetov.
Onyń aıtýynsha, elordada josyqsyz salýshylar bar, olar qoqysty belgilengen jerge shyǵarmaı, únemdeıdi, qurylystan shyqqan qoqysty ekopolıgonda kómý úshin tonnasyna 3 500 teńge tóleý kerek.
«Qoqysty apta saıyn shyǵaramyz. Óndiris sondaı, qurylys qoqyssyz bolmaıdy, qoqys kúnde shyǵady, jınalyp qalady. Endi ákimdiktiń talabymen kúnde shyǵaratyn bolamyz», - deıdi «TemirRemStroıServıs» JShS ýchaskesiniń bastyǵy Beıimbet Kajenov.
Aıta keteıik, tabıǵat qorǵaý polıtsııasynyń ınspektorlary qala syrtynda da reıdter ótkizip, qoqys tastaıtyn júk kólikterin toqtatady. Jyl basynan beri belgilenbegen jerlerge qoqys tastaǵany úshin júk kóliginiń 28 jáne assenızatorlyq mashınanyń 33 júrgizýshisi jaýapkershilikke tartyldy.
