Alty aıda Astanada 350-den astam órt sóndirildi
ASTANA. 17 shilde. QazAqparat - Astanada birinshi jartyjyldyqta órt sóndirýshiler 364 órtti aýyzdyqtady,
dep habarlaıdy alǵashqy alty aıdyń qorytyndysyn shyǵarǵan TJD baspasóz qyzmeti.
«Bıylǵy jyldyń alǵashqy jarty jylynda 364 órt oqıǵasy tirkeldi. Bul ótken 2012 jyldyń osy kezeńimen salystyrǵanda - 7 % az. Ótken jyly 390 órt shyǵyp, 38 mln. 893 myń teńge materıaldyq shyǵyn keltirilgen bolatyn. Materıaldyq shyǵyn da aldyńǵy jylmen salystyrǵanda 1,8 ese azaıyp, 76 mln. 151 myń teńge bolyp otyr. 114 mln. 566 myń teńgeniń materıaldyq qundylyqtary órtten qutqaryldy. Bir ókinishtisi, órt kezinde 11 adam kóz jumyp (2012 jyly - 11), 24 adam (2012 jyly - 29) jaraqat aldy»,- delingen TJD baspasóz qyzmetiniń málimetinde.
Elordanyń resmı saıtynyń jazýynsha, kóp jaǵdaıda órt elektr jabdyqtaryn ornatý men paıdalaný erejelerin saqtamaý (25%), elektr symdary men avtomobılderde qysqa tuıyqtalý (23% jalpy órt sanynan), órt qaýipsizdigi men jylytý peshterin paıdalaný kezinde erejelerdiń buzylýy (11,5%), elektr jabdyqtaryn paıdalaný barysynda órt qaýipsizdiginiń erejeleri buzylýy (7%) sekildi sebepterden bolady.
Vedomstvo baspasóz qyzmeti habarlaǵandaı, birinshi jartyjyldyqta kóbine turǵyn úı sektory órtke oranǵan - 160 oqıǵa (44% jalpy órt sanynan), avtokólik -92 (28,6%), salynyp jatqan qurylys nysandary men qurylys alańdary - 35 (9,6%), óndiristik negizdegi ǵımarattar men iri qurylystarda - 27 (7,4%), sondaı-aq saýda oryndary men qoımalarda 19 (5,2%) órt shyǵý oqıǵasy tirkeldi.
