Alty aıda 110 myńnan astam elordalyq júrgizýshige aıyppul salyndy
ASTANA. 12 shilde. QazAqparat - Elordada alǵashqy jartyjyldyqta jol polıtsııasy ınspektorlary 120 myń ákimshilik quqyqbuzýshylyqty anyqtap, 110 myń júrgizýshige aıyppul saldy, dep habarlaıdy qalalyq Jol polıtsııasy basqarmasynan.
«Bıylǵy jyldyń alǵashqy 6 aıynda jol polıtsııasy ınspektorlary 120 myń ákimshilik quqyqbuzýshylyqty anyqtady. 110 myńnan astam júrgizýshige jalpy kólemi 839,5 mıllıon teńgedeı aıyppul salyndy. Odan memleketke 532 mln. teńgeden astam paıda óndirildi. Alǵashqy jartyjyldyqtyń qorytyndysy boıynsha Jol erejesin buzǵany úshin aıyppul alý 63 paıyz boldy», - delingen vedomstvo habarlamasynda.
JPB málimetteri boıynsha, tek alty aıdyń qorytyndysynda Astana qalasynyń sot aktilerin oryndaý departamentine basqarmadan 341,5 mıllıon teńgeden astam soma kóleminde aıyppul óndirý úshin 39,5 myń qaýly kelip túsken. Olardyń 40 mıllıony memlekettik bıýdjetke qaıtaryldy. Oqý oryndary men turǵylyqty mekenjaılary boıynsha 159 mln. teńgeniń 21 myńnan astam qaýlysy jiberildi. Olardyń 20 mıllıonnan astam teńgege 2,5 myńy oryndaldy.
Bul aqshalardy qoǵamdyq tártip saqshylary aıyppuldaryn ýaqytynda tólemegen avtoáýesqoılardan mekemeleri arqyly jappaı tekserip, óndirip alýdy kózdeýde.
Astana.kz saıtynyń jazýynsha, búgin Astanadaǵy «Qyzyljar» beketinde sot oryndaýshylarymen birlesken reıdtik is-sharalar uıymdastyryldy. Reıd barysynda jol polıtsııasy qyzmetkerleri 10-ǵa jýyq aıyppul tólemegen astanalyq turǵyndy ustady. Tekserý kezinde olardyń avtokóligi tehnıkalyq tekserýden ótpegeni anyqtaldy. Jol polıtsııasy ınspektorlary quqyq buzýshylarǵa qatysty ákimshilik hattama toltyrdy. Sondaı-aq, sot oryndaýshylardyń qatysýymen júrgizýshilermen aıyppuldy ýaqytynda tóleý jóninde áńgime ótkizilip, quqyqbuzýshylar 5 kún ishinde aıyppuldy tóleýi kerektigi jóninde qoldaryna habarlamalar berildi. Tólemegen jaǵdaıda avtomobıli aıyppul turaǵyna qoıylady.
