Alty altyn izdeýshi karerde aýa jetpeı kóz jumdy
NUR-SULTAN. QazAqparat – Kongo Demokratııalyq Respýblıkasynyń shyǵysynda ornalasqan Djýgý aýdanynda altyn óndiriletin karerde jumys istep jatqan alty altyn izdeýshi otteginiń jetispeýinen kóz jumdy, dep habarlaıdy QazAqparat jergilikti Actualite portalyna silteme jasap.
BAQ-tan belgili bolǵandaı, zańsyz jumys istegen kenshiler dúısenbi kúni túnde «Essizdik» ataýymen belgili karerde qaza tapqan. Ol Djýgý aýdanyna qarasty Mýngvalý aýyldyq kommýnadan jeti shaqyrymdaı qashyqtyqta ornalasqan.
«Bir qudyqta jalpy 8 adam jumys istep jatqan. Otteginiń jetispeýinen osyndaı problema týyndaǵan. Ekeýi kómek kórsetilip, aman qaldy, qalǵan altaýy oqıǵa ornynda kóz jumdy», - dedi Mýngvalý aýyldyq kommýnasynyń basshysy Jan Per Bıkılısende.
Shahtanyń polıtsııa jasaǵy tergeý ótkizý úshin oqıǵa ornyna keldi.
