Alty adamǵa Pavlodardyń Qurmetti azamaty ataǵy berildi
PAVLODAR. QazAqparat - Kezekten tys máslıhat sessııasynda oblys ákimi apparatynyń jetekshisi Aǵybaı Amırın Pavlodar oblysynyń Qurmetti azamaty ataǵyna usynylǵan azamattardyń tizimin jarııalady, dep habarlaıdy QazAqparat pavlodarnews.kz saıtyna silteme jasap.
Usynylǵan azamattardyń ishinde aımaqtyń áleýmettik-ekonomıkalyq damýyna súbeli úles qosqan alty azamat bar.
Munaı ónimderimen qamtamasyz etý basqarmasyna basshylyq etken Ǵabdolla Arǵynov 1936 jyly Omby oblysynyń Novovarshavksıı aýdanynda dúnıege kelgen. 1953 jyly Ertis aýdany Telman segiz jyldyq mektebinde oqý isiniń meńgerýshisi, dırektory, keıin Ertis aýdany Sývorovskıı aýylyndaǵy mekteptiń dırektory qyzmetin atqarǵan. Onyń bastamasymen alǵashqy oqytýshylyq óndiristik brıgada qurylǵan. «Eńbek eri», «Qyzyl tý», «Qurmet» ordenderimen, «Oblys aldynda sińirgen eńbegi úshin» medaldarymen marapattalǵan.
Energetıka salasynyń ardageri, «Qazsýsharýashylyǵy» respýblıkalyq kásiporny fılıaly dırektorynyń keńesshisi Leonıd Batalov 6 qyrkúıekte 1936 jyly Altaı ólkesinde týǵan. Eńbek jolyn 1952 jyly Shyǵys Qazaqstan oblysynda dánekerleýshi bolyp bastaǵan.
Memlekettik syılyqtyń laýreaty. «Ekibastuz» balalar qorynyń quryltaıshysy, úshinshi dárejeli «Shahter Dańqy» belgisiniń ıegeri Raıs Gaınýlın basqarǵan kásiporyn qaıyrymdylyq sharalarǵa belsendi túrde kómek kórsetip turady.
Saǵadat Ysqaqov aýyl sharýashylyǵy salasynyń qaıratkeri, «Qyzyl tý», «Oktıar», «Sotsıalıstik eńbek eri» ordenderiniń ıegeri.
Muhıt Omarov qoǵam qaıratkeri, jýrnalıst, ekonomıst-ǵalym. Túrli medaldarmen jáne Qurmet gramotasymen marapattalǵan. Elýden astam ǵylymı maqalasy, monografııasyy bar.
Quqyq qorǵaý salasynyń ardageri Dmıtrıı Faleev kóp jyldar eńbegi úshin «QR prokýratýrasynyń qurmetti qyzmetkeri» belgisiniń ıegeri.
