Altynshy joldama: Bekzad Nurdáýletov álem kýbogynyń fınalyna shyqty

ASTANA. KAZINFORM - Elordadaǵy World Boxing aıasynda ótip jatqan álem kýbogynda Bekzad Nurdáýletov  (85 keli) fınaldyq kezeńge ótip, altynǵa talasýǵa múmkindik aldy. 

Otandasymyz jartylaı fınalda túrkııalyq Samet Ersoımen qolǵap túıistirip, qarsylasyn aıqyn basymdylyqpen jeńdi. Úsh raýnd boıy túrkııalyq boksshyny soqqynyń astyna alǵan Bekzad, úshinshi raýndta ony nokdaýnǵa jiberdi.

B. Nurdáýletov 1999 jyly dúnıege kelgen. 2019 jyly álem chempıony ataǵyn jeńip alsa, 2024 jyly Azııa chempıonatynda jeńis tuǵyryna kóterildi. 2020 jyldan beri kásipqoı boksta da sharshy alańǵa shyǵyp júr.

Endi el quramasynan keshki sessııada Alýa Balqybekova (51 keli), 57 keli. Aıdana Zabynbekova (57 keli), Aıda Ábikeeva (65 keli), Nadejda Rıabets (75 keli), Mahmud Sabyrhan (55 keli), Ertýǵan Zeınýllınov (65 keli), Sabyrjan Aqqalyqov (75 keli), Aıbek Oralbaı (90 keliden joǵary) sharshy alańǵa shyǵady. 

Aıta ketsek, qazirge deıin Nurbek Oralbaı (80 keli), Nazym Qyzaıbaı (48 keli), Vıktorııa Grafeeva (60 keli), Natalıa Bogdanova (70 keli), Sanjar Táshkenbaı (50 keli) altyn júldeni sarapqa salýǵa múmkindik aldy. 

Jartylaı fınalǵa Qazaqstan atynan 14 boksshy joldama alǵan bolatyn.