Altynshash Islamova Mańǵystaý oblysy statıstıka departamentine basshy bolyp taǵaıyndaldy

AQTAÝ. KAZINFORM - Ulttyq statıstıka bıýrosynyń Mańǵystaý oblysy boıynsha departamentiniń basshysy bolyp Altynshash Islamova taǵaıyndaldy.

Buǵan deıin ol Mańǵystaý oblysy boıynsha bıýro departamenti basshysynyń orynbasary qyzmetin atqarǵan.

Ujymǵa jańa basshyny strategııalyq josparlaý jáne reformalar agenttiginiń apparat basshysy Jomart Ábıesov tanystyrdy. 

Altynshash Sultanqyzy Islamova Sh. Esenov atyndaǵy Aqtaý ýnıversıtetin «Ónerkásip jáne azamattyq qurylys» mamandyǵy boıynsha jáne Mańǵystaý «Bolashaq» ınstıtýtyn «Ekonomıka» mamandyǵy boıynsha bitirgen. 

Eńbek jolyn 1994 jyly Mańǵystaý oblysynyń statıstıka basqarmasynda ekonomıst bolyp bastaǵan.

Budan ári áleýmettik-demografııalyq statıstıka, eńbek jáne qamtý bóliminiń aǵa mamany bolyp jumys istedi.

Ol sondaı-aq qyzmet kórsetý jáne ekonomıka statıstıkasy bóliminiń bas mamany bolǵan. 2003-2004 jyldary Aqparattyq-statıstıkalyq ortalyqtyń sharýashylyq bóliminde jumys istedi. 

2005 jyldan bastap ónerkásip statıstıkasy bóliminde túrli qyzmetterdi atqardy.

2011-2018 jyldary ınvestıtsııa jáne qurylys statıstıkasy basqarmasynyń bastyǵy bolyp jumys istedi.

2018 jyldan bastap búginge deıin Mańǵystaý oblysynyń statıstıka departamenti basshysynyń orynbasary qyzmetin atqardy. 

«Statıstıka úzdigi» tósbelgisimen marapattalǵan.