Altynalmas ónerkásip ornyndaǵy jumysshy qazasy boıynsha is qozǵaldy
QARAǴANDY. KAZINFORM – Qaraǵandy oblysynyń Aqtoǵaı aýdanyndaǵy óndiristik nysanda bolǵan adam ólimine ákep soqqan qaıǵyly oqıǵanyń mán-jaıyn tergeýshiler anyqtap jatyr. Sonymen qatar oqıǵanyń sebepterin Memlekettik eńbek ınspektsııasynyń arnaıy komıssııasy da zerttep jatyr.
«Pýstynnoe» ken-baıytý kombınatynda qyzmetkerdiń qaza tabýyna baılanysty qylmystyq is qozǵaldy.
Qaraǵandy oblysy Polıtsııa departamenti baspasóz qyzmetiniń málimetinshe, tergeý Qazaqstan Respýblıkasy Qylmystyq kodeksiniń 156-babynyń 3-bóligi – «Eńbekti qorǵaý qaǵıdalaryn buzý» boıynsha júrgizilip jatyr.
– Qazirgi ýaqytta oqıǵanyń mán-jaıyn jan-jaqty, tolyq ári obektıvti anyqtaýǵa baǵyttalǵan qajetti tergeý áreketteri júrgizilip jatyr, – dep habarlady vedomstvo.
Qaraǵandy oblysynyń Memlekettik eńbek ınspektsııasy departamentiniń málimetine sáıkes, oqıǵa 23 shilde kúni Aqtoǵaı aýdanyndaǵy «Pýstynnoe» ken-baıytý kombınatynyń aýmaǵynda bolǵan. Qaldyq barabanyn tazalaý kezinde 31 jastaǵy mashınıst jumys istep turǵan konveıerge tartylyp ketken. Alǵan aýyr jaraqattarynyń saldarynan er adam oqıǵa ornynda kóz jumdy.
– Oqıǵaǵa baılanysty Memlekettik eńbek ınspektsııasy departamenti arnaıy komıssııa qurdy. Tergeý qorytyndysy shyqqannan keıin onyń nátıjeleri qosymsha habarlanady, – dedi Qaraǵandy oblysy Memlekettik eńbek ınspektsııasy departamenti basshysynyń orynbasary Mádı Áljan.
Eske sala keteıik, qaıǵyly oqıǵa 23 shilde kúni shamamen saǵat 11:30-da «AK Altynalmas» AQ-nyń óndiristik nysandarynyń biri sanalatyn «Pýstynnoe» ken-baıytý kombınatynyń aýmaǵynda bolǵan.
Kompanııa buǵan deıin qyzmetkerdiń qaza tapqanyn rastaǵan jáne oqıǵanyń mán-jaıyn anyqtaý maqsatynda ishki qyzmettik tekserý bastalǵanyn habarlaǵan.
