«Altynalmas» Maıqaıyń halqynyń ózekti máselelerin sheshýge yntaly
PAVLODAR. KAZINFORM - «Altynalmas AK» kompanııasy Maıqaıyńnyń «Shanhaı» shaǵyn aýdanyndaǵy eski úılerdiń máselesin sheshýge belsene kirisip jatyr. Jergilikti turǵyndar kásiporynnyń talpynysyna qarap, uzaq ýaqyttan beri jurtty alańdatyp kelgen túıin kóp keshikpeı tarqaıdy degen úmitte.
Túsiniktirek bolýy úshin aıtyp óteıik, «Maıqaıyńaltyn» AQ ornalasqan Maıqaıyń kentindegi kenishtiń dál túbinde turǵyndardyń úıleri ornalasqan. Shahtanyń sanıtarııalyq-qorǵaý aımaǵyna enip turǵan baspanalardyń turǵyndary byltyr ózderin qaýipsiz jerge kóshirýdi ótingen edi.
Baıanaýyl aýdany ákimdiginiń málimetinshe, bul jerde shamamen 76 úıdi kóshirý kerek. Atap aıtqanda, Altyn dala kóshesinde - 30 úı, Kenjebaev kóshesinde - 7 úı, Kenshi kóshesinde - 18 úı, Á. Moldaǵulova kóshesinde - 19 úı, Jaıaý Musa kóshesinde - 2 úı qaýipti aımaq ótinde tur. Olarda jalpy sany 270-ten astam adam adam turyp jatyr.
Jýyqta «Altynalmas AK» AQ «Maıqaıyńaltyn» AQ-nyń jarǵylyq kapıtalyndaǵy 100% úlesin satyp alý mámilesin sátti aıaqtaǵany týraly jazǵanbyz.
Kásiporynnyń «Altynalmas» kompanııalar tobyna qosylýy onyń turaqty damýyn qamtamasyz etip, ónerkásiptik qaýipsizdik deńgeıin arttyrady jáne taý-ken óndirisin tıimdi jalǵastyrýǵa jaǵdaı jasaıdy dep kútilgen edi.
Shynynda jańa ıesi kenttegi áleýmettik jáne ınfraqurylymdyq máselelerdi sheshýge qazirden-aq kirisip ketti. «Shanhaı» shaǵyn aýdany turǵyndarynyń bazynasyn estip bilgen aktsıonerlik qoǵam basshylyǵy 24 sáýir kúni Maıqaıyńǵa arnaıy kelip, atalǵan aýmaq turǵyndarymen kezdesý ótkizdi. Jurtshylyqpen júzdesýge jaqynda ǵana «Maıqaıyńaltyn» AQ bas dırektory bolyp taǵaıyndalǵan Danıal Nábıev, «Altynalmas» kompanııasynyń is basqarý dırektory Gúlnur Haletova, qoǵammen baılanys bóliminiń basshysy Nurbıke Rahımova, qoǵammen qarym-qatynas júrgizý mamany Temirlan Mádıev jáne Baıanaýyl aýdanynyń ákimi Ardaq Kisentaev pen kent basshysy Erbatyr Moldataev qatysty.
Kezdesýde tolǵaǵy jetip turǵan «Shanhaı» shaǵyn aýdanynyń máselesi boıynsha kópshiliktiń usynystary men pikirleri tyńdaldy.
- Qurmetti turǵyndar, «Altynalmas» kompanııasy kenttegi altyn kásipornyn jýyqta ǵana satyp alǵandyqtan jergilikti jerdegi keıbir máseleler bizge beımálim bolýy múmkin. Kompanııamyz «Maıqaıyńaltyn» AQ-da buryn bolǵan keıbir jaıttar úshin jaýapty bola almaıtynyn da túsinýlerińiz kerek. Bizdiń maqsatymyz – kásiporyndy damyta otyryp, kent turǵyndary úshin qolaıly ómir súrý ortasyn qurý. Búgingi kezdesýimizdiń máni de osynda. Eń áýeli sizderdi nendeı máseleler tolǵandyratynyn bilgimiz keledi. Usynys-tilekterińizdiń nátıjesin jınaqtap, biz «Altynalmas» basshylyǵyna usynamyz. Odan ári taldap, eń naqty ári durys sheshimderdi jarııa etemiz. Shahtanyń sanıtarııalyq-qorǵaý aımaǵyndaǵy eski baspanalardyń turǵyndaryna ózge jerden úıler salyp beremiz be, álde olardy satyp alyp, tıisti deńgeıde qunyn ótep beremiz be, sony sizdermen birlesip aqyldasýymyz kerek. Men sizderdiń janaıqaılaryńyzdy jaqynyraq, tereńirek bilsem deımin. Bul aldaǵy máselelerdi sheshý úshin asa mańyzdy, - dedi Danıal Nábıev.
Kásiporyn basshylyǵynyń halyqqa janashyrlyq nıetterin baıqaǵan kent turǵyndary sheshilip sóıledi. Olardyń sózinshe, «Shanhaıdaǵy» úılerdiń deni sonaý 50-60-shy jyldary saman kirpishten turǵyzylǵan. Keıin keıbir otbasylar olardyń ishi-syrtyn qaptap, baspanalardyń «ómirin uzartýǵa» tyrysqan.
- Kenishtiń jer astynda ken jarý jumystary kóptegen jyldar boıy úzbeı júrgizilip keledi. Ár jarylys kezinde úıimiz opyrylyp túsip, bala-shaǵamyzben opat bolamyz ba dep qorqamyz. Janymyzdy shúberekke túıemiz. Jarylys saldarynan úılerimizdiń sylaǵy túsip, irgetasy, qabyrǵalary jarylyp jatyr. Altyn kásipornynyń gúldenýine ata-analarymyz bar ómirlerin arnady. Qartaıǵan shaqta durys baspanaǵa qol jetkizip, beınetiniń zeınetin kórgisi keledi. Ókinishke qaraı, ol baqyt bizdiń aǵa býyn úshin ázirshe buıyrmaı tur. Keıbir úıler apattyq jaǵdaıda. Olardyń turǵyndary amalsyzdan balalarynyń, týystarynyń úılerin jaǵalap kóship ketti. Endi biri ortalyqtaǵy páterlerdi jaldaýǵa májbúr. Al qaýipti aımaqta turyp jatqan turǵyndardyń barar jeri, basar taýy joq. Otbasylardyń turmystary qarapaıym, kóbi zeınetaqyǵa qarap otyrǵan jandar, - dep muńyn shaqty jergilikti turǵyn Asqar Aıtmaǵambetov.
Tájik-aýǵan soǵysynyń ardageri Tólegen Botaev – kópbalaly otbasynyń otaǵasy. Aıtýynsha, úıiniń irgetasy qaqyrap, sógilip barady. Eger kásiporyn onyń baspanasyn satyp alamyz dese, ol turǵyn úshin tıimdi emes.
- Úı degen aty ǵana. Ábden tozyp, qulaǵaly tur. Ony aqshaǵa satyp puldaý múmkin emes. Erteń baǵalaýshylar nysannyń jaǵdaıyn kórgende ózge jerden úı satyp alýǵa jeterlik aqsha usynbaıtyny anyq. Sondyqtan meniń tilegim – úı salyp berińizder, - degen naqty usynysyn jetkizdi ol.
Onyń sózin aqsaqal Atshabar Altybaı da qostady. Qarııanyń úıindegi eki bólmeniń ishinde aǵash tireýler tur. Tóbesi qulap kete me degen qaýippen otbasy músheleri tireý qoıylmaǵan ózge bólmede uıyqtap júrmiz dep muńyn shaqty.
- Bul úıden ózge barar baspanamyz joq. Jyl saıyn úıimizdi jóndeı-jóndeı shyǵynǵa battyq. Menikindeı kóne úıler «Shanhaıda» óte kóp. Aqsha bergenderińizben jańadan úı salyp alatyn qýat qalǵan joq. Jańadan baspana salyp berseńizder, aımaqtan kósher edik, - degen pikirin bildirdi qart.
Endi bir turǵyndar óz úılerin qymbat materıaldar qoldanyp, záýlim etip qaıta salǵandaryn, sondyqtan aımaqta tynysh qala berýge ruqsat berińizder degen tilekterin aıtty. Turǵyndardyń aıtýynsha, ortalyqtaǵy eń jaqsy úılerdiń quny 25 mıllıon teńgege deıin jetýi múmkin. Múlikti baǵalaýshylar olardyń úılerine ondaı baǵa usynbaýy yqtımal, sondyqtan aımaqta qala berýge nıetti.
- Úıimizdi tastap ketýge de, buzýǵa da qımaımyz. Ómir boıyna turyp kelgen soń áp-sátte bosatyp ketip qalý oıymyzǵa syımaıdy. Baý-baqsha egemiz, jazda qaladan nemerelerimiz kelip aýlada oınaıdy. Endi bir turǵyndar aýyl sheti bolǵan soń mal ustap, aǵarǵandaryn aıyryp otyr. Kásiporynnyń jańa ıeleri bul máseleni turǵyndarmen kelise otyryp, barlyǵyna tıimdi bolatyndaı etip sheshkeni jón dep bilemin, - dep qosty óz usynysyn zeınetker Aıman Muqsınova.
Al maıqaıyńdyq ájeı Kájen Synǵadolla byltyrdan beri kópqabatty úıdegi páterge kóship ketkenin aıtady. «Shanhaıda» eski jer úıi qalyp otyr. Ǵımarat jekemenshigi bolǵan soń kásiporynnan ótemaqy talap etýge quqyly.
- Eń durysy, meniń eski úıimdi baǵalap, qolyma qarajat berseńizder soǵan qanaǵat etemin. Meniń bul pikirimdi osynda otyrǵan turǵyndardyń birazy qoldaıdy. Sebebi olar qarajatty ózge qolaıly jerden páter satyp alýǵa jumsaımyz dep sheshim qabyldady, - deıdi ol.
«Altynalmas AK» ókilderi sanıtarııalyq-qorǵaý aımaǵynda ornalasqan 76 úı ıeleriniń árqaısymymen jeke-jeke sóılesiletinin jetkizdi. Bul jerde úıdiń jaǵdaıy ǵana esepke alynbaıdy, kólemi, jer telimi, aýlasy, bári-bári baǵalaý krıterıılerinde kórsetiledi.
Buǵan deıin Aqmola oblysyndaǵy Aqsý kentinde ornalasqan bizdiń kompanııaǵa tıesili kásiporyn aınalasynda osyndaı másele týyndaǵan.
- Turǵyndarmen kelisim boıynsha, táýelsiz baǵalaý kompanııasynyń kómegimen 2020 jyldan bastap biz qaýipti aımaqta ornalasqan 202 úıdi baǵalap, satyp aldyq. 2025 jyldyń basynan beri 42 úı satylyp alyndy. Barlyq úı ıeleri usynylǵan baǵaǵa qanaǵattandy. Qazir ol jerdegi másele sheshimin tapty. Bizge ár úı ıesiniń sheshimi mańyzdy. Eger aqshalaı tólemge kelisse, eki kúnniń ishinde barlyq resimderdi júrgizip, esepshotyna qarajatty aýdaryp beremiz. Kompanııaǵa bul úılerdiń jeri kerek degen de - qate uǵym. Kenishke jaqyn turǵan úı turǵyndary ózderin qaýipsiz sezinýi kerek. Al olar ózge jerge kóshemiz dese, biz óz qarajatymyzdyń esebinen álgindeı usynystardy jasap otyrmyz. Al tańdaý árqashan óz erikterińizde, - dep atap ótti olar.
Osylaısha qazirgi ýaqytta «shanhaılyq» úı ıeleriniń pikiri úshke jarylyp tur. «Altynalmas AK» AQ basshylyǵy tek «Shanhaı» ǵana emes, tutas kenttiń áleýmettik-ınfraqurylymdyq jaǵdaıyn damytýǵa yntaly ekenin bildirip otyr. Bul úshin kompanııa aldaǵy ýaqytta oblys ákimdigimen áleýmettik jaýapkershilik boıynsha arnaıy memorandýmǵa otyrýdy oıǵa alǵan. Jergilikti qoǵammen turaqty kezdesýler ótkizilip, onda turǵyndardyń qolaıly ómir súrý jaǵdaılaryn jasaýǵa baǵyttalǵan basym qajettilikter anyqtalady. Budan bólek, kenish pen eldi meken arasynda shań-tozańdy tutyp qalatyn, tabıǵı tosqaýyl qyzmetin atqaratyn «jasyl beldeý» qurý kózdelgen. Tek bıyldyń ózinde 600 qaıyń men 700 qaraǵash kóshetteri egiledi dep josparlanǵan.