«Altynalmas» Aqbaqaıda jumysshy kóz jumǵanyn rastady

ASTANA. KAZINFORM — «Altynalmas» kompanııasynyń basshylyǵy men eńbek ujymy 18 qyrkúıekte Aqbaqaıda bolǵan jazataıym oqıǵa jóninde málimdeme jasady.   

Sol kúni topyraq opyrylyp, ken ornynyń kútim jasaý jáne jóndeý slesari Nurdáýlet Jeksenuly Nurmahanov kóz jumǵan bolatyn.  

«Altynalmas AK» AQ marqumnyń týystary men jaqyndaryna kóńil aıtty. 

Nurdáýlet Jeksenuly 2012 jyldyń 1 qańtarynan beri «Altynalmas AK» AQ Aqbaqaı taý-ken baıytý kesheniniń jyljymaly jáne statsıonarlyq jabdyqtaryna kútim jasaý jáne jóndeý ýchaskesinde sorǵy qondyrǵylarynyń mashınısi bolyp jumys istep kelgen. 

2017 jyly jabdyqqa tehnıkalyq kútim jasaý jáne jóndeý slesari bolyp taǵaıyndalady.

«Ujymda bedeldi, jumysta birbetkeı minezdi edi, jaýapkershilik pen kásibı sheberliktiń joǵary deńgeıin kórsetti. Jumys barysynda ózin joǵary bilikti maman retinde tanytty. Nurdáýlet Jeksenuly áriptesteriniń, dostarynyń jáne búkil ujymnyń júreginde máńgi saqtalady» deıdi kompanııadan.

Sonymen qatar, Altynalmas osy oqıǵadan keıin birden jumys toby qurylǵanyn habarlady. Arnaıy komıssııa jazataıym oqıǵanyń mán-jaıy men sebepterin anyqtaıdy.

Sondaı-aq qaza tapqan qyzmetkerdiń otbasyna materıaldyq kómek kórsetedi jáne tıisti tólemder boıynsha óziniń búkil mindettemelerin oryndaıdy.

Buǵan deıin habarlaǵanymyzdaı, Jambyl oblysyndaǵy kenishte taý jynysy qulap, topyraq astynda jumysshy qalyp qoıdy.

Keıinnen osy oqıǵa boıynsha sotqa deıingi tergeý bastaldy.