Altyn urlady dep azaptaý oqıǵasy: UQK burynǵy qyzmetkerleri úkimdi jeńildetýdi surady
ASTANA. KAZINFORM – QR Ulttyq qaýipsizdik komıtetiniń tórt qyzmetkerine «quramynda altyny bar shıkizatty urlady dep aıyptalǵan 13 tutqyndy aıaýsyz azaptady» degen aıyp taǵylyp, bıyl sáýirde Aqmola garnızony áskerı soty úkim shyǵarǵan bolatyn.
Apellıatsııalyq shaǵym túsirgen sottalýshylardyń isi búgin Astana qalasyndaǵy áskerı sotta qaıta qaraldy.
Esterińizge salsaq, qoǵamdy eleń etkizgen oqıǵa 2021 jyly naýryzda bolǵan edi. Sol jyly Semeıdegi «Alel» qarjy ınvestıtsııalyq korporatsııasy ıgerip jatqan Sýzdal kenishi zaýytynan «asa baǵaly metaldy jymqyrdy» degen kúdikpen 59 adam qamaýǵa alynǵan-dy.
«Halyqaralyq qylmystyq topqa» qatysy bar dep ustalǵandardyń týystary olardy tergeý oryndary azaptaǵany týraly san márte shaǵym jazyp, 2022 jyly Sybaılas jemqorlyqpen kúres agenttigi UQK qyzmetkerlerine qatysty qylmystyq is qozǵaǵan. Tergeý barysynda 46 adam azap kórgender qatarynda aıtylǵanymen, keıin tek 13 adam jábirlenýshi bolyp tanyldy.
Cotqa deıingi tergeý de, sot ta uzaq júrdi. Jarty jylǵa sozylǵan sot tergeýinde UQK qyzmetkerleri kúdiktilerdi Astanadaǵy tergeý ızolıatoryndaǵy UQK qurǵan arnaıy dálizde azaptap, altyn urlyǵyn «moıyndatqany» dáleldendi.
Belgili bolǵandaı, sottalýshylar sý qaınatatyn qurylǵyny kúdiktilerdiń aýyzdaryna salyp, tokqa qosqan, rezeńkemen, judyryqpen, taıaqpen uryp, ústerine sýyq sý quıǵan. Olardy 20 saǵat boıy qozǵalyssyz turýǵa májbúrlegen. Eger bireý qozǵalsa, jazalap uryp-soqqan. Adamdar birneshe kún uıyqtamaǵan. Bul aıǵaqtarǵa qol qoımas buryn jasalǵan. Al tutqyndar tipti ózderiniń nege qol qoıǵanyn da bilmegen. Qabyrǵalary synǵan, óksheleri jaraqattanǵan, qulaq qalqandary jarylǵan bir adamǵa operatsııa jasalǵan. Mıdyń shaıqalýy barlyǵynda derlik tirkelgen.
UQK burynǵy qyzmetkerlerine QR Qylmystyq kodekstiń 146-baby boıynsha «Qatygezdik, adamgershilikke jatpaıtyn nemese qadir-qasıetin qorlaıtyn qarym-qatynas, azaptaý» boıynsha aıyp taǵylyp, 22 sáýirde Aqmola garnızony áskerı soty UQK 5-departamenti 4-basqarmasynyń podpolkovnıgi Erkin Amanovty 6,5 jylǵa, UQK maıory Hamıt Ábdýǵanı, kapıtan Qaırat Sartaev pen shekara qyzmeti kúzeti tobynyń mamany Qýandyq Muhtarhanovty 5 jylǵa bostandyǵynan aıyrýǵa úkim shyǵardy. Aldyńǵy úsheýine 3 jylǵa deıin organda qyzmet etýge shekteý qoıylsa, Qýandyq Muhtarhanovqa ómir boıyna memlekettik qyzmette, qarjy salasynda jumys isteýge tyıym salyndy.
Sottalýshylar sot úkimi qolyna tıgen soń on bes kún ishinde apellıatsııalyq shaǵym túsirýge múmkindik aldy. Sóıtti de. Búgin Astana qalasyndaǵy áskerı sotta sottalýshylardyń advokattary jaza tym qatań ekenin alǵa tartyp, jeńildetetin faktorlardy atap ótti. Advokattar sottalýshylardyń kinásin moıyndaǵanyn, tergeý sharalaryna qolǵabys kórsetkenderin, shyǵyndardy ótegenin, kámelet jasqa tolmaǵan balalary bar ekenin alǵa tartty. Tipti, jábirlenýshi taraptyń eshqandaı kiná taqpaıtynyn jetkizdi.
Aıtpaqshy, sottalýshylardyń advokattary arnaıy dálizdiń («spetsrodol») pandemııa kezinde qurylǵan arnaıy oryn ekenin joqqa shyǵaryp otyr. Advokattardyń paıymdaýynsha, ol jer kúdiktilerdi azaptaý úshin arnaıy qurylǵan. Arnaıy dáliz Astananyń Baıqońyr aýdanyndaǵy Alash shossesi 30/1 mekenjaıyndaǵy №64 mekemeniń (tergeý ızolıatory) 1-korpýsynyń úshinshi qabatynda ornalasqan. Ol UQK jáne Astana qalasy prokýrory men qalalyq qylmystyq atqarý júıesi departamenti basshylarymen birge jasalǵan josparǵa saı iske asyrylǵan.
Sot protsesi erteń jalǵasyn tabady.
