«Altyn sapa» ıegerleriniń tabysy 2,7 ese ósken
ASTANA. KAZINFORM – «Altyn sapa» syılyǵyna qatysýǵa bıyl 384 kásipker ótinim berdi. Bul týraly Úkimet otyrysynda «Atameken» ulttyq kásipkerler palatasynyń basqarma tóraǵasy Qanat Sharlapaev málim etti.
Onyń aıtýynsha, palatanyń negizgi baǵyttarynyń biri otandyq taýarlardyń sapasy men básekege qabilettiligin arttyrý. Osy maqsatta kásipkerlerdi qoldaýǵa baǵyttalǵan birqatar joba júzege asyrylyp keledi.
– 2023 jyldan beri «Bir aýyl – bir ónim» jobasy iske asyrylyp keledi. Joba aıasynda 238 kásipker irikteldi. Jalpy somasy 642 mıllıon teńgege 136 joba qarjylandyryldy. Nátıjesinde 116 kásipker zamanaýı óndiristik jabdyqtarmen qamtamasyz etildi, aýyldyq jerlerde 564 jańa jumys orny ashyldy. Bul qoldaý jergilikti bıznestiń damýyna jáne óńirlerde kásipkerlik ortanyń qalyptasýyna oń yqpalyn tıgizip jatyr, – dedi Qanat Sharlapaev.
Sondaı-aq ol bıznestiń «Altyn sapa» syılyǵyna qyzyǵýshylyǵy jyl saıyn artyp kele jatqanyn aıtty.
– Máselen, byltyr atalǵan syılyqqa qatysýǵa 222 kásipker ótinim bildirse, bıyl bul kórsetkish 384-ke jetip otyr. Marapattan keıingi úsh jylda bul kásiporyndardyń jyldyq kirisi orta eseppen 2,7 ese artyp, 20,7 mıllıard teńgege jetken. Ótken jyly «Altyn sapa» laýreattary bes halyqaralyq marapatqa ıe boldy, – dedi basqarma tóraǵasy.
Budan bólek, óńirlerde «Qazaqstannyń úzdik taýary» respýblıkalyq baıqaý-kórmesi ótkizilip keledi. Osy ýaqytqa deıin baıqaýǵa 6 myńnan astam kásipker qatysyp, olardyń arasynan 162 dıplomant anyqtaldy. Bıyldyń ózinde konkýrsqa 620 ótinim qabyldanǵan.
Aıta keteıik, jarty jylda ishki taýar aınalymynyń kólemi 36,2 trln teńge boldy.
