Altyn Ordanyń tikeleı muragerimiz — Memleket basshysy
ASTANA. KAZINFORM — Jańa Konstıtýtsııada myńdaǵan jyldarǵa sozylatyn tarıhy bar Uly dala sabaqtastyǵyn saqtaý qasterli paryz ekeni naqty kórsetildi. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Barshańyzǵa belgili, Qazaqstan sońǵy jyldary aýqymdy saıası jáne ekonomıkalyq reformalardy júzege asyryp jatyr. Munyń elimiz úshin asa mańyzdy jáne óte jaýapty qadam ekeni sózsiz. Sondyqtan biz aldymyzda turǵan mindetti de jaqsy túsinemiz: sana ózgermeı, qoǵam da jańǵyrmaıdy, memleket te órkendemeıdi. Bul — aqıqat, — dedi Qasym-Jomart Toqaev.
Prezıdenttiń atap ótýinshe, onyń ishinde tarıhı sabaqtastyqty saqtaý máselesi asa ózekti.
— Onsyz eshqandaı damý bolmaıtyny anyq. Ótkenge qurmetpen qaramasaq, jarqyn bolashaqqa qaraı bet alý da qıyn bolmaq. Sol sebepti biz ozyq oıly ult retinde tek qana alǵa qaraı nyq senimmen qadam basamyz. Jalpyulttyq referendýmda qabyldanǵan jańa Konstıtýtsııada myńdaǵan jyldarǵa sozylatyn tarıhy bar Uly dala sabaqtastyǵyn saqtaý qasterli paryz ekeni naqty kórsetildi. Óıtkeni biz — memleket isinde «Máńgilik el» ıdeıasyn tý etken Altyn Ordanyń tikeleı muragerimiz, — dedi Memleket basshysy.
Prezıdent Altyn Orda sol kezeńdegi kóptegen memleketke qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
