«Altyn Ordanyń murasy» atty kreatıvti jármeńkege 6 myńǵa jýyq adam keldi
ASTANA. KAZINFORM — Elordadaǵy Qazaq Creative Hub alańynda «Creative Aimaq» respýblıkalyq jobasy aıasynda Ulytaý oblysynyń «Altyn Ordanyń murasy» atty kreatıvti jármeńkesi ótti, dep habarlaıdy qala ákimdiginiń resmı saıty.
Eki kún ishinde jármeńkege 6 myńǵa jýyq elorda turǵyny men qonaǵy keldi.
Jármeńkede kelýshiler avtorlyq zergerlik buıymdar, ulttyq qolóner týyndylary, Ethno Fashion baǵytyndaǵy dızaınerlik kıimder, bylǵary men kıizden jasalǵan buıymdar, kádesyı ónimderi, sándik-qoldanbaly óner týyndylary, keskindeme jumysy jáne dástúrli quraq kórpe tehnıkasynda daıyndalǵan toqyma buıymdarymen tanysyp, unaǵan túrlerin satyp aldy.
Іs-sharaǵa Ulytaý oblysynan arnaıy kelgen 60 jetekshi kreator qatysyp, óńirdiń shyǵarmashylyq áleýeti men biregeı ónimderin kópshilik nazaryna usyndy. Bul jármeńke óńirlik brendterdiń tanymaldylyǵyn arttyrýǵa jáne jergilikti shyǵarmashylyq kásipkerlerdiń ónimderin keń aýdıtorııaǵa tanystyrýǵa múmkindik berdi.
Іs-sharanyń basty sándik baǵdarlamalarynyń biri Ethno Fashion Show kórsetilimi boldy. Qazaqstandyq dızaınerler Altyn Orda dáýiriniń tarıhy men estetıkasynan shabyt alǵan zamanaýı kıim toptamalaryn usyndy. Al alǵashqy kúnniń mádenı baǵdarlamasy Jez Acoustic Band tobynyń kontserttik keshimen qorytyndylandy.
Ulytaý oblysynyń jármeńkesi Creative Aimaq jobasynyń óńirlik kreatıvti ındýstrııalardy damytýǵa, otandyq kreatıvti brendterdiń tanymaldylyǵyn arttyrýǵa, otandyq óndirýshilerdiń ótkizý naryǵyn keńeıtýge jáne elimizdiń baı tarıhı-mádenı murasyn keńinen nasıhattaýǵa baǵyttalǵan tıimdi alań ekenin aıqyn kórsetti.
Buǵan deıin habarlanǵandaı, kreatıvti ındýstrııaǵa jatatyn qyzmet túrleriniń sany 53-ke jetti.
