Altyn Ordanyń ekonomıkalyq qurylymyn jan-jaqty zerttegen jón — Toqaev
ASTANA. KAZINFORM — Kóshpendilik pen otyryqshylyq saltynyń úılesim tabýy Altyn Ordanyń tarıh sahnasyna jarqyraı shyǵýynyń birden-bir sebebi boldy. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Altyn Ordanyń ekonomıkalyq qurylymyn jan-jaqty zerttegen jón. Barshamyzǵa belgili, ejeldegi Mesopotamııa, Mysyr, Qytaı, Úndistan órkenıetteri kóp jaǵdaıda ózen ańǵarlaryn ıgerý arqyly qalyptasty. Al Uly Dala múldem basqa tarıhı damý jolynan ótti. Osydan 5 myń jyl buryn qazirgi Qazaqstannyń soltústiginde ornalasqan Botaı jerinde adam balasy eń alǵash ret jylqyny qolǵa úıretti. Bul álem tarıhyna túbegeıli jańa sıpat bergen oqıǵa boldy, — dedi Prezıdent.
Memleket basshysynyń aıtýynsha, atqa miný mádenıetimen qatar dala órkenıetinde strategııalyq oılaý qabileti jáne meılinshe qolaıly ómir súrý salty paıda boldy.
— Osylaısha, Altyn Orda Eýrazııanyń ulanǵaıyr dalasyndaǵy barlyq negizgi kólik, saýda jáne gýmanıtarlyq baılanystardy baqylaýynda ustap, salt atty kóshpendiler órkenıetiniń eń bıik shyńyna kóterildi. Bul oraıda kóshpendilik pen otyryqshylyq saltynyń úılesim tabýy Altyn Ordanyń tarıh sahnasyna jarqyraı shyǵýynyń birden-bir sebebi boldy deýge tolqy negiz bar. Túptep kelgende Altyn Orda kóshpendiler ómirin qaladaǵy qolóner mádenıeti men saýda joldaryn ózara tyǵyz baılanysta damytý arqyly turaqty aqsha jáne salyq júıesi bar, ekonomıkasy damyǵan el retinde qalyptasty, — dedi Qasym-Jomart Toqaev.
Sımpozıým barysynda Prezıdent Altyn Orda Batys pen Shyǵysty jalǵap, túrli órkenıetterdiń damýyna, memleketterdiń qalyptasýyna erekshe yqpal etken asa iri saıası qurylym bolǵanyn aıtty.
