Altyn Ordaǵa arnalǵan jańa kollektsııalyq moneta shyǵady
ASTANA. KAZINFORM — Qazaqstan Ulttyq banki «Este qalatyn oqıǵalar men birtýar adamdar» serııasynan «ALTYN ORDA» kollektsııalyq monetasyn aınalysqa shyǵarady.
Monetanyń satýǵa qashan shyǵarylatyny týraly aqparat QUB resmı saıtynda qosymsha habarlanady.
Altyn Orda – XIII-XV ǵasyrlarda Eýrazııanyń saıası, ekonomıkalyq jáne mádenı damýyna eleýli yqpal etken aımaqtaǵy eń iri memleketterdiń biri. Ol Shyǵys pen Batys arasyndaǵy turaqty saýda baılanysyn qamtamasyz etip, Uly Jibek joly boıyndaǵy halyqaralyq alys-beristiń jandanýyna, sondaı-aq kópultty ári kópkonfessııaly keńistiktiń qalyptasýyna negiz boldy.
Altyn Ordanyń tarıhı murasy Uly dalanyń myń jyldyq órkenıet sabaqtastyǵyn pash ete otyryp, qazirgi Qazaqstan aýmaǵyn qosa alǵanda, Eýrazııa memlekettiligi men halyqtarynyń mádenı biregeıligin aıqyndaýda mańyzdy oryn alady. Bul dáýir qala mádenıetiniń, qolónerdiń, aqsha júıesi men dıplomatııalyq qatynastardyń qarqyndy damýymen sıpattalady. Kollektsııalyq monetany shyǵara otyryp sol dáýirdi zerdeleý tarıhı jadyny saqtaýǵa, mádenı murany nasıhattaýǵa jáne memlekettilik jolyndaǵy mańyzdy kezeńderdi dáripteýge baǵyttalǵan.
Altyn jalatylǵan moneta 925 synamaly kúmisten turady, massasy 62,2 gramm, dıametri 50 mm, daıyndaý sapasy – «proof», nomınaly 2 000 teńgelik, taralymy – 1 000 (bir myń) dana.
Moneta Qazaqstan Respýblıkasynyń búkil aýmaǵynda ózderiniń belgilengen qunyna saı tólemderdiń barlyq túri boıynsha qabyldanýǵa, sondaı-aq eldiń barlyq bankinde banktik shottarǵa esepke alynýǵa, aýdarýǵa, usaqtalýǵa jáne aıyrbastalýǵa jatady.
Moneta Qazaqstan teńge saraıynda daıyndaldy.
Aıta ketelik FIFA WORLD CUP 2026 kollektsııalyq monetalary aınalysqa shyǵatyny týraly jazǵan edik.
