Altyn Orda týraly tarıhı serıaldyń aqtyq kadrlary túsirilip jatyr
ASTANA. KAZINFORM — Altyn Orda tarıhı serıalyn qolǵa alǵan shyǵarmashylyq top túsirý jumystarynyń aqtyq satysyna kiristi.
— The Golden Empire-dyń túsirilim toby óndiristiń aqtyq satysyna kiristi. Basty nazar fılmniń aqtyq kórinisterinde. Bul epızodtar sıýjet jelisin bir izge túsirip, oqıǵalar shıelenisin aıaǵyna deıin bosańsytpaı, naqty ekpin berýge tıis. Jetisýda ótip jatqan túsirilimder toptamanyń mazmundyq yrǵaǵyn da, keskindik yrǵaǵyn da kúsheıtetin lokatsııalarǵa baı. Túsirýshi komanda negizgi dıalogtarmen, keıipkerlerdiń ishki túısigin ashatyn kórinistermen osy jerde jumys isteıdi. Deshti-Qypshaq jeri týyndyda rýlyq qurylymdardyń múddesi men bılik taıtalasynyń, jeke sheshimderdiń keńistigine aınalǵan. Negizgi epızodtardyń birinde keıipkerge kúrdeli kelissózder júrgizip qana qoımaı, óziniń qandaı tártip úshin kúresetinin aıqyndaýyna týra keledi, — dep jazylǵan jobanyń baspasóz-relızinde.
— Kórermendi ózi ómir súrip kórmegen dáýirdiń demimen tynystatý qashan da úlken synaq. Bul kórinister jaı ǵana ekshen emes, adam tańdaýy týraly hıkaıalar. Ol kórinister kadr syrtyndaǵy sózben baıandalady. Sońǵy kúnderi túsirilip jatqan kórinister naqtylyq pen ustamdylyqty, ishki jan dúnıedegi shıelenistermen muqııat jumys isteýdi qajet etedi. Qazaqstandyq akterlerdiń oıyny osy turǵydan nanymdy ári dáýirdiń dramalyq kelbetin naqty bere alady, — deıdi rejısser Emre Sahın.
9 mamyr kúni Jetisý oblysyndaǵy túsirilim alańyna Memlekettik keńesshi Erlan Qarın baryp qaıtqan. Ol shyǵarmashyl toppen túsirilimniń aqtyq satysyna daıyndyqty pysyqtap, týyndyǵa túıin bolatyn kórinisterdiń negizgi qyrlaryn, sondaı-aq, túsirilimnen keıingi uıymdastyrý jumystaryn talqylady.
The Golden Empire toptamasyn túsirip jatqan top Qazaqstan aýmaǵynda 8 biregeı lokatsııada jumys istegen. Onyń ishinde Sýyqtóbe, Eskeldi bı aýyldary, Butaq jáne Kimasar shatqaldary, kıeli Tamǵaly tas mekeni men Kóshpeliler qalashyǵy bar.
Atalǵan jobany Karga Seven Pictures halyqaralyq kıno kompanııasy qolǵa alǵanyn aıta ketý kerek. Bul kompanııa Netflix-ke de derekti jáne kórkem toptamalar túsirip júrgen ujym retinde tanymal. Al Altyn Orda tarıhy týraly toptama jobasyna Prezıdent bastamalarynyń Dara qory qoldaý kórsetip keledi.
Eske salsaq, sáýir aıynyń ortasynda The Golden Empire telehıkaıasynyń túsirilimi bel ortasyna taıaǵanyn habarlanǵan bolatyn.