Altyn Orda taqyryby eshqashan ózektiligin joǵaltpaıdy — Prezıdent
ASTANA. KAZINFORM — Altyn Orda Batys pen Shyǵysty jalǵap, túrli órkenıtterdiń damýyna, memleketterdiń qalyptasýyna erekshe yqpal etken asa iri saıası qurylym boldy. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Altyn Orda Eýrazııanyń ulanǵaıyr aýmaǵyn erkin jaılap, Uly Dala tósinde bılik qurǵan qýatty ımperııa bolǵanyna eshqandaı tarıhshy, ıaǵnı birde-bir tarıhshy kúmán keltirmeıdi. Bul — moıyndalǵan tarıhı derek. Altyn Orda Batys pen Shyǵysty jalǵap, túrli órkenıtterdiń damýyna, memleketterdiń qalyptasýyna erekshe yqpal etken asa iri saıası qurylym boldy. Bul da dáleldengen derek. Sondyqtan Altyn Orda tarıhy kóptegen irgeli zertteýlerge arqaý bolǵany anyq. Degenmen, bul taqyryp áli de ózektiligin joıǵan joq. Endeshe, eshqashan joǵaltpaıdy. Bul ult jylnamasy men álem tarıhy úshin óte mańyzdy másele, — dedi Memleket basshysy.
Prezıdent halyqaralyq ǵylym qaýymdastyǵymen birlese otyryp, osy taqyrypty júıeli ári jan-jaqty zerdeleý jumysyn jalǵastyrý kerektigin basa aıtty.
— Birneshe kúnge sozylatyn is-sharanyń negizgi maqsaty da osy. Bul tusta Qazaqstannyń bastamasyna qoldaý kórsetkeni úshin ıÝNESKO basshylyǵyna rızashylyǵymdy aıtqym keledi. Bul forýmǵa qatysyp otyrǵan ıÝNESKO-nyń burynyń bas dırektory Odre Azýle hanymǵa alǵysymdy aıtamyn. Siz Qazaqstan men ıÝNESKO arasyndaǵy áriptestikti nyǵaıtýǵa mol úles qostyńyz. Sımpozıýmnyń osyndaı bedeldi jahandyq uıym aıasynda ótýi Altyn Orda murasynyń álemdik aýqymdaǵy mán-maǵynasy zor ekenin kórsetedi, — dedi Qasym-Jomart Toqaev.
Esterińizge sala ketsek, osy jyldyń qańtar aıynda Qyzylorda qalasynda ótken Ulttyq quryltaıdyń V otyrysynda Memleket basshysy Qasym-Jomart Toqaev Altyn Orda tarıhyna arnalǵan halyqaralyq sımpozıým uıymdastyrylatynyn, is-sharaǵa álemniń bedeldi ǵalymdary shaqyrylatynyn aıtqan edi.
