Altyn Orda óz damýynda strategııalyq ashyqtyq qaǵıdatyna berik boldy — Memleket basshysy
ASTANA. KAZINFORM — Altyn Orda sol kezeńdegi kóptegen memleketterge qaraǵanda óz damýynda strategııalyq ashyqtyq qaǵıdatyna berik boldy. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Kóptegen bedeldi ǵalymnyń pikirinshe, qazir Altyn Ordanyń aqsha júıesinde mán-mańyzy aıryqsha jańalyqtar ashylyp jatyr. Arheologtar osy kezge deıin beımálim bolyp kelgen ondaǵan tıyn saraıyn tapty. Mamandardyń aıtýynsha, naǵyz órleý kezeńinde Altyn Ordada shamamen 28 mln kúmis tıyn soǵylǵan. Qazirgi tańda memlekettik jáne jeke qorlarda sol dáýirge tıesili tıyndardyń jalpy sany 1 mln-ǵa jetedi. Qazaqstannyń ulttyq valıýtasy — teńge ataýy ulystyń «dang» sózinen tamyr tartady. Dengı sóziniń túbiri de osy uǵymnan taralǵan bolýy múmkin. Buǵan jaı ǵana lıngvıstıkalyq sáıkestik retinde qaraýǵa bolmaıdy. Bul keń baıtaq aımaǵymyzda paıda bolǵan aqsha júıesiniń Altyn Orda zamanynda jasalǵanyn kórsetetin naqty dálel. Altyn Orda Uly jibek jolynyń soltústik tarmaǵyn túgel baqylaýda ustap, dalany qaýipsiz tasymal dálizi retinde damytty, - dedi Prezıdent.
Joshy ulysynyń aýmaǵy arqyly myńdaǵan tonna taýar jóneltilip jatty.
— Atap aıtqanda, Qytaıdan jibek, Úndistannan dámdeýishter, Reseı jerinen teri ónimderi, Eýropadan, Taıaý jáne Orta Shyǵys elderinen qolóner buıymdary tasymaldandy. Altyn Orda sol kezeńdegi kóptegen memleketke qaraǵanda óz damýynda strategııalyq ashyqtyq qaǵıdatyna berik boldy. Bul ustanym qalalardyń turpatynan da anyq baıqaldy. Sebebi ulys gúldenip turǵan zamanda qalalardy bıik qamalmen qorshap, tuıyqtaý bolǵan joq. Ár qala qarqyndy saýda ortalyǵy retinde adamdardyń erkin qozǵalysyna beıimdelip damydy. Bul tájirıbe dala men qala arasynda qaqtyǵystar tolastamady degen ańyz-áńgimelerdi túbegeıli joqqa shyǵarady. Kerisinshe, osy baılanystar orta ǵasyrdaǵy eń ońtaıly memlekettilik úlgisiniń negizin qalady, — dedi Qasym-Jomart Toqaev.
Sımpozıým barysynda Prezıdent Altyn Orda Batys pen Shyǵysty jalǵap, túrli órkenıetterdiń damýyna, memleketterdiń qalyptasýyna erekshe yqpal etken asa iri saıası qurylym bolǵanyn aıtty.
