Altyn Orda murasy ıÝNESKO shtab-páterinde tanystyryldy
ASTANA. KAZINFORM – Astanada ótken Altyn Orda tarıhyna arnalǵan halyqaralyq sımpozıýmnyń qorytyndylary ıÝNESKO-nyń Parıjdegi shtab-páterinde ótken halyqaralyq konferentsııada tanystyryldy.
Órkenıetter arasyndaǵy halyqaralyq dıalog kúnine oraı uıymdastyrylǵan «Jibek jolynyń murasy, saıahat pen dástúr: mádenıetaralyq dıalog baǵynda» atty konferentsııaǵa ıÝNESKO basshylyǵy, Jibek joly boıyndaǵy memleketterdiń elshileri, tarıhshylar men mádenı mura salasynyń sarapshylary qatysty.
Qazaqstannyń ıÝNESKO janyndaǵy Turaqty ókili Asqar Abdrahmanov óz sózinde elimizdiń Jibek jolynyń damýyna qosqan úlesin jáne onyń ekonomıkalyq ári mádenı baılanystardy nyǵaıtýdaǵy rólin atap ótti.
Elshi konferentsııa qatysýshylaryn 2026 jylǵy 19–20 mamyrda Astanada ótken «Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıýmnyń nátıjelerimen tanystyrdy.
Onyń aıtýynsha, sımpozıýmǵa Azııa, Eýropa, Amerıka jáne Taıaý Shyǵystyń 20-dan astam elinen 300-den astam delegat qatysqan. Bul Altyn Orda men Uly Dala tarıhyn zertteýge halyqaralyq ǵylymı qaýymdastyqtyń qyzyǵýshylyǵy joǵary ekenin kórsetti.
Asqar Abdrahmanov Altyn Orda dáýirinde Jibek jolynyń soltústik tarmaǵy arqyly Qytaı jibegi, Úndistan dámdeýishteri, Reseı ań terileri, Ortalyq Azııa jylqylary men Eýropa jáne Taıaý Shyǵys elderiniń qolóner buıymdary tasymaldanǵanyn atap ótti.
Sondaı-aq Joshy Ulysynyń ekonomıkalyq qýaty onyń bıleýshileri atynan soǵylǵan kóptegen teńgeler arqyly da kórinis tapqanyn aıtty. Búginde Eýrazııanyń ár óńirinen tabylyp jatqan osy teńgeler sol dáýirdegi saýda jáne mádenı baılanystardy tereńirek zertteýge múmkindik berip otyr.
– ıÝNESKO qamqorlyǵymen ótken Altyn Orda murasy jónindegi aýqymdy sımpozıým halyqaralyq ǵylymı qaýymdastyqtyń Eýrazııa men Uly Dalanyń ortaq tarıhyn keń ári jańa kózqaraspen zertteýge joǵary qyzyǵýshylyq tanytyp otyrǵanyn kórsetti, – dedi dıplomat.
Ol ıÝNESKO basshylyǵyna Qazaqstan bastamasyna qoldaý kórsetkeni, sımpozıým jumysyna belsendi qatysqany jáne ǵylymı pikirtalastarǵa úles qosqany úshin alǵys bildirdi.
Óz kezeginde sımpozıýmǵa qatysqan Lazar Elýndý Assomo is-sharanyń joǵary deńgeıde uıymdastyrylǵanyn atap ótti. Onyń pikirinshe, mundaı bastamalar Eýrazııa halyqtarynyń adamzattyń ortaq mádenı murasyna qosqan úlesin jan-jaqty zertteýge jol ashady.
Konferentsııa sońynda qatysýshylar Jibek joly elderiniń, sonyń ishinde Qazaqstannyń ulttyq taǵamdarynan dám tatty.
Aıta keteıik, buǵan deıin Jent qalasynda Altyn ordanyń teńge saraıy jumys istegeni týraly jazyldy.
