«Altyn Orda» mańyndaǵy keptelis: Máseleni jolaıryq ta sheshe almady
ALMATY. KAZINFORM — «QazAvtoJol» UK» AQ oblystyq fılıaly Kazinform tilshisiniń saýalhatyna jaýap bere otyryp, «Almaty – Bishkek» avtomobıl jolyn keńeıtý jumystary josparlanǵanyn málimdedi.
Ulttyq kompanııa málimetinshe, «Altyn Orda» bazary mańyndaǵy kópir qurylysy aıaqtalyp, keptelis máselesi sheshilgen.
«Altyn Orda bazarynyń mańyndaǵy joldyń ishki (tranzıt) bóliginde kólik qozǵalysy boıynsha keptelis máselesi joıylǵan. Al syrtqy nemese eki jaq jol bóligi bazar mańynda ornalasqandyqtan bazarǵa kirip-shyǵatyn kólik sanynyń kóbeıýi saldarynan keptelis paıda bolyp otyrady», — delingen kompanııa jaýabynda.
«Altyn Orda» bazary men «Aport» saýda ortalyǵy mańynda birneshe shaqyrymǵa sozylatyn keptelis keshki ýaqytta baıqalady.
«Respýblıkalyq mańyzy bar «Almaty – Bishkek» avtomobıl jolynyń 19-27 shaqyrym aralyǵyn (ÚAAAJ – Qaskelen) keńeıtý josparda. Jospar boıynsha qozǵalys jolaqtary sanyn alty-segizge jetkize otyryp keńeıtý, úsh jerde ár deńgeıdegi jol aıryǵy («taǵa» tıpti keri burylys) jáne jol ústi jaıaý júrginshiler ótkelderi qarastyrylǵan»,- dep atap ótti QazAvtoJol ókilderi.
Qazir jobalyq-izdestirý jumystaryna konkýrýs jarııalandy. Jobany iske asyrý 2025-2027 jyldary kózdelgen.
«Sonymen qatar, ústimizdegi jyly atalǵan jol bóligine taǵy bir ár deńgeıdegi jol aıryǵy («taǵa» tıpti keri burylys) nysanynyń qurylys-montajdaý jumystaryn bastaýǵa daıyndyq júrgizilip jatyr»,- dep túsindirdi kompanııadan.
Osyǵan deıin «Altyn orda» bazary mańyndaǵy «Almaty-Raıymbek» ýchaskesinde jańa bas magıstraldyq estakada paıdalanýǵa berilgen bolatyn.
Mamandar, Altyn orda», «Barlyq» bazary men «Moll Aport» saýda - oıyn-saýyq ortalyǵynyń ornalasqan jeri eskerilgenin jáne estakadada qozǵalystyń ashylýy jol ýchaskesiniń ótkizý qabiletin arttyryp, halyqqa qolaıly jaǵdaı jasaıtynyn atap ótken edi.
Polıtsııa departamentiniń málimetinshe, 10 negizgi magıstral boıynsha Almaty aýmaǵyna jumys kúnderi orta eseppen 400 myńnan astam avtomobıl kiredi. Al, oblystan qalaǵa kiretin qosymsha 17 jolmen 300 myńnan astam kólik keledi.
Osylaısha, megapolıs kóshelerimen kún saıyn 700 myńnan astam mashına júredi. Bul shamamen qala halqynyń úshten biri – 2,147 mln adam.
Buǵan deıin, «Almaty-Talǵar» tasjolynyń keńeıtiletinin jazǵan edik.
