Altyn Orda kezeńindegi altyn japsyrmasy Saraıshyq mýzeıine tapsyryldy
ATYRAÝ. KAZINFORM – Atyraý oblysyndaǵy ortaǵasyrlyq Saraıshyq qalashyǵynyń ornynan Altyn Orda kezeńindegi altyn japsyrmasy tabylǵan. Eki jyldan soń bul jádiger Saraıshyqtaǵy mýzeıge tapsyryldy.
Atyraý oblystyq tarıhı-ólketaný mýzeıiniń dırektory Muhambetqalı Kıpıevtiń aıtýynsha, 2023-2024 jyldary ortaǵasyrlyq Saraıshyq qalashyǵynyń ornynda arheologııalyq zertteý jumysyn júrgizilgen. Sol kezde Jaıyq ózeniniń jaǵasyndaǵy 3 myń sharshy metrden astam aýmaqta 12 bólme, turǵyn úılerge tán pesh, tandyr sýfa (yspa) orny anyqtalǵan.
– Arheologııalyq zertteýdiń nátıjesinde Altyn Orda kezeńine tán kóp jádiger tabylǵan. Onyń ishinde soǵý ádisimen jasalyp, arabsha jazýmen, ósimdik sýretimen bezendirilgen kúmis, qola tıyndar, kóptegen qysh ydystar, áshekeıler, janýarlardyń súıekteri men metall buıymdar bar. Erekshe nazar aýdartqan jádigerdiń biri – Altyn Orda kezeńine tıesili altyn japsyrma. Mundaı jádiger alǵash ret tabyldy. Osy kezge deıin ortaǵasyrlyq Saraıshyq qalashyǵyna birneshe ret arheologııalyq zertteý jumysy júrgizildi. Biraq altyn buıym tabylmaǵan edi, -deıdi Muhambetqalı Kıpıev.
Onyń pikirinshe, altyn japsyrma qobdıshanyń nemese kishkentaı sandyq qaqpaǵynyń topsasy retinde qoldanylǵan bolýy múmkin. Bul buıym órnekteý tásili arqyly jasalǵan. Japsyrmanyń joǵarǵy bóliginiń aınalasyna ırektelgen órnek salynypty.
– Joǵarǵy jáne tómengi bóligi qoshqar múıiz oıýymen órnektelgen. Topsaǵa bektitýge arnalǵan eki tesigi bar. Altyn japsyrmanyń ólshemi tym úlken emes. Onyń uzyndyǵy – 6, eni – 1 sm. Al qalyńdyǵy 0,2 sm quraıdy. Mýzeı qyzmetkerleri altyn japsyrmaǵa restavratsııa júrgizdi. Sodan keıin ony «Saraıshyq» memlekettik tarıhı-mádenı mýzeı-qoryǵyna tapsyrdyq. Osy kezge deıin tarıhı qalashyqtaǵy mýzeı-qoryǵy 286 jádigermen tapsyrylǵan edi, -dep málim etti Muhambetqalı Kıpıev.
Eske sala ketelik, budan buryn Atyraý oblysyndaǵy qorǵandardan Sarmat dáýiriniń altyny tabylǵanyn jazǵan bolatynbyz.