Altyn Orda dáýiri otandyq tarıhymyzdyń mańyzdy bóligi — Prezıdent
ASTANA. KAZINFORM — Altyn Orda dáýiri otandyq tarıhymyzdyń mańyzdy bóligi, sonymen birge biz bul kezeńdi aýqymdy órkenıet paradıgmasy turǵysynan qarastyramyz. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Kóptegen halyqtyń tarıhı jadynda reformatorlar men kórnekti oıshyldardyń qalypty tirshiligine qaraǵanda, bıleýshilerdiń joryǵy men daryndy qolbasshylardyń erlikteri saqtalatynyn joǵaryda aıtyp óttim. Rasynda, soǵystardaǵy ańyzǵa aınalǵan jeńister adamdardyń rýhyn oıatady. Al taǵdyrsheshti máni ýaqyt óte kele baıqalatyn ınstıtýtsıonaldy jańashyldyqtar men ozyq ıdeıalarǵa kópshilik selt ete qoımaıdy. Oǵan áli kúnge deıin Uly dala tarıhynyń sheksiz shaıqastar men urystar retinde burmalanyp kórsetilýi naqty mysal bola alady. Mundaı syńarjaq ustanym Uly dalanyń, ásirese, Altyn Ordanyń kúrdeli, kóp qatparly ómir saltyn áskerı shejirelerdiń oıdan shyǵarylǵan ólshemderine salyp, tarıhı shyndyqtan alystatady, oqıǵalardy kómeskilendire túsedi, — dedi Qasym-Jomart Toqaev.
Prezıdent qazirgi ǵylymnyń joǵary pánaralyq damý deńgeıi Altyn Orda tarıhyn obektıvti zertteý úderisterin jetildirýge múmkindik beredi dep sanaıtynyn aıtty.
— Búgingi jıynda atalǵan kezeńdi zerttep júrgen bedeldi ǵalymdar bas qosyp otyr. Osy oraıda Altyn Orda tarıhyn paıymdaý perspektıvasyn keńeıtýge kómektesetin birqatar ǵylymı izdeniske baılanysty óz oıymdy qysqasha jetkizgim keledi, — dedi Memleket basshysy.
Prezıdent Altyn Orda sol kezeńdegi kóptegen memleketterge qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
