Altyn orda bazarynda kartopty birden 70 teńgege qymbattatyp jibergen

ALMATY. KAZINFORM — Baǵany turaqtandyrý maqsatynda Almaty ákimdigi satyp alýdyń forvardtyq ádisin júzege asyryp jatyr. 

Almaty qalasy ákimdiginen málim etkendeı, 9-14 qańtar aralyǵynda «Altyn Orda» bazaryndaǵy saýdagerler kartoptyń kóterme baǵasyn 28%-ǵa nemese 70 teńgege (bir kelisi 250 teńgeden 320 teńgege deıin) qymbattatyp jiberdi. 

— Pavlodar jáne Qaraǵandy oblystaryndaǵy sharýalar kartop aýrýy men ysyraptyń artýyn alǵa tartyp onyń baǵasyn ósirdi. Sonymen qatar Ózbekstannan kelgen kásipkerlerdiń kartoptyń úlken partııasyn satyp alý faktisi bar. Osyǵan baılanysty Pavlodar jáne Qaraǵandy oblystarynyń kásipkerleri tarapynan baǵany sharyqtatý úshin ózara sóz baılasý belgileri de baıqalǵan, - dep atap ótti ákimdikten.

Baǵany turaqtandyrý maqsatynda Almaty ákimdigi satyp alýdyń forvardtyq ádisin júzege asyryp jatyr. 

— Kartop baǵasyn turaqtandyrý úshin forvardtyq satyp alý aıasynda Almaty ákimdigi Magnum dúkender jelisinde satylatyn 9,3 myń tonna kartopty belgilengen baǵamen jetkizýge kelisimshart jasady. Qazir onyń 1 140 tonnasy satyldy, - dep jaýap berdi qala ákimdigi Kazinform agenttiginiń saýalyna. 

Qazir atalǵan dúken sórelerinde bir keli kókónistiń ortasha baǵasy – 157 teńge. Bul «Altyn Orda» bazaryndaǵy kóterme baǵadan eki ese tómen (320 teńge). 

Buǵan deıin Nazgúl Hatepova eldegi kartop baǵasy aldaǵy 2-3 kúnde turaqtanatynyn aıtqan edi. 

Sondaı-aq elimizde kartopty ózge elderge eksporttaýǵa 6 aıǵa shekteý qoıyldy. 

Al, aýyl sharýashylyǵy mınıstrligi kartop qory ishki qajettilikti tolyq qamtamasyz etýge jetkilikti ekenin málimdegen bolatyn.