«Altyn Orda» bazarynda azyq-túlik baǵasyn negizsiz kótergen 7 deldaldyń jumysy toqtatyldy
QONAEV. KAZINFORM – Almaty oblysynda áleýmettik mańyzy bar azyq-túlik taýarlarynyń baǵasyn turaqtandyrý baǵytyndaǵy baqylaý jumystary barysynda birqatar iri saýda sýbektileriniń zań talaptaryn buzǵany anyqtaldy.
Saýda jáne ıntegratsııa mınıstrliginiń habarlaýynsha, JK «Omarov», «Iceberg Distribution» JShS jáne «Ar Dıas» JShS áleýmettik mańyzy bar azyq-túlik ónimderin tómen baǵada satyp alyp, olardy basqa saýda sýbektilerine 17%-dan 86%-ǵa deıingi negizsiz saýda ústemesimen qaıta satqan.
Atalǵan faktiler boıynsha jospardan tys tekserýler júrgizilip, zańnama talaptaryn buzǵan sýbektilerge aıyppul salyndy.
– Jyl basynan beri júrgizilgen baqylaý is-sharalary nátıjesinde 171 saýda sýbektisine qatysty 643 ákimshilik hattama toltyrylyp, jalpy somasy 3,4 mıllıon teńgeden astam aıyppul salyndy. Onyń 467-si áleýmettik mańyzy bar azyq-túlik taýarlaryna belgilengen shekti saýda ústemesin asyrý faktileri boıynsha rásimdelse, 176 hattama saýda qyzmeti týraly zańnama talaptaryn buzýǵa qatysty toltyrylǵan, - delingen vedomstvonyń baspasóz qyzmeti taratqan habarlamada.
Sondaı-aq jyl basynan beri tekserý barysynda bir saýda jelisi, bir kóterme saýda orny jáne 11 saýda sýbektisi áleýmettik mańyzy bar azyq-túlik taýarlaryna 40%-dan 203,8%-ǵa deıin negizsiz ústeme qosqany anyqtaldy.
Sonymen qatar óńirlik komıssııanyń jumysy aıasynda «Altyn Orda» bazaryndaǵy 13 saýda sýbektisine jospardan tys tekserý júrgizilip, nátıjesinde azyq-túlik baǵasynyń ósýine áser etken 7 tıimsiz deldaldyń qyzmeti toqtatyldy.
Mınıstrlik qazirgi ýaqytta óńirde óndirýshiler men iri jetkizýshilerdiń tizimi qalyptastyrylyp, elektrondyq shot-faktýralar arqyly deldaldyq shemalardy anyqtaý jáne joıý jumystary jalǵasyp jatqanyn málimdedi.
Eske salaıyq, buǵan deıin Premer-mınıstrdiń orynbasary – ulttyq ekonomıka mınıstri Serik Jumanǵarın tóraǵalyǵymen ótken Úkimet otyrysynda azyq-túlik ınflıatsııasy men áleýmettik mańyzy bar azyq-túlik taýarlary baǵasynyń qazirgi ahýaly qaralǵanyn habarlaǵan edik.
