«Altyn orda» bazarynda ashyqtyqty qamtamasyz etý úshin ne isteldi
ASTANA. KAZINFORM – QR Saýda jáne ıntegratsııa mınıstrliginiń baspasóz qyzmeti «Altyn orda» bazary jumysynyń ashyqtyǵyn qamtamasyz etý boıynsha atqarylyp jatqan jumystar týraly málimetterdi jarııalady.
QR Saýda jáne ıntegratsııa mınıstrliginiń Saýda komıteti «Altyn orda» bazarynyń ákimshiligimen birlesip bekitken «Altyn orda» bazary jumysynyń ashyqtyǵyn qamtamasyz etýdiń birlesken is-sharalar josparyn oryndaý sheńberinde 2023 jylǵy jeltoqsannan bastap bazar aýmaǵynyń 6 kireberisinde QR-kodtary bar avtomatty shlagbaýmdar men kirý aqysyn tóleý úshin pavılondarda 6 POS-termınal ornatyldy.
Sonymen qatar, «Altyn Orda» bazaryn tsıfrlandyrý boıynsha «altynordaresmi.kz» aqparattyq veb-saıty iske qosyldy. Onda azamattarǵa qoljetimdi saýda oryndarynyń sany, olardyń alańy, jaldaý quny týraly aqparatty, sondaı-aq jaldaý (paıdalaný) shartynyń talaptary, ony buzý tártibi men negizderi týraly aqparat qamtylǵan.
Bazar basshylyǵy tarapynan keri baılanys alý úshin onlaın-shaǵym berý jáne usynys engizý múmkindigi engizildi.
Joǵaryda atalǵan sharalar bazar qyzmetiniń ashyqtyǵyn qamtamasyz etý jáne bıýdjetke salyq tólemderiniń túsimderin ulǵaıtý úshin qabyldanatynyn atap ótken jón.
Esterińizge sala keteıik, 2023 jyldyń tamyzynda Saýda jáne ıntegratsııa mınıstri Arman Shaqqalıev anyqtalǵan buzýshylyqtardy joıý, naryqty jańǵyrtý jáne fermerler úshin tegin saýda oryndaryn usyný jónindegi jumysty úılestirý úshin bazar aýmaǵynda mobıldi toptyń qatysýymen keńeıtilgen keńes ótkizdi.
2023 jylǵy jeltoqsanda Saýda Komıtetiniń tóraǵasy Aıdar Ábildabekov «Altyn Orda» bazaryna baryp, bazar ákimshiligimen saýda alańdaryn jańǵyrtý máselelerin talqylady. Keńes qorytyndysy boıynsha Aıdar Ábildabekov qysqa merzimde bıznes-protsesterdi tsıfrlandyrýǵa kóshýdi jedeldetýdi tapsyrdy.
