Altyn men kúmistiń quny rekord jańartýdy jalǵastyryp jatyr

ASTANA. KAZINFORM – Comex bırjasynda (NYMEX bólimshesi) baǵaly metaldar – altyn men kúmistiń quny eń joǵary deńgeılerin jańartýdy jalǵastyryp jatyr. Bul týraly saýda alańdarynyń derekterine súıene otyryp TASS habarlady.

Saýda derekterine sáıkes, 18:12-de (Máskeý ýaqyty) kúmis baǵasy 3,95% ósip, bir troıa ýntsııasy $100,18 boldy. Osy ýaqytta aqpan aıynda jetkiziletin altyn fıýchersiniń baǵasy $4 956,2 deńgeıinde qalyptasty (+0,87%).

Al 19:31-de (Máskeý ýaqyty) naýryz aıynda jetkiziletin kúmis fıýchersiniń quny ósimdi údetip, bir troıa ýntsııasy $101,165 deńgeıine jetti (+4,97%). Osylaısha, kúmis tarıhı maksımýmyn 1,5 saǵat ishinde ekinshi márte jańartty. Sonymen qatar aqpanda jetkiziletin altyn fıýchersi de ósimdi kúsheıtip, bir troıa ýntsııasy $4 989,9 boldy (+1,56%), bul kórsetkish te tarıhı maksımým retinde tirkeldi. 

«Garda kapıtala» kompanııasynyń ınvestıtsııalyq sarapshysy Aleksandr Bahtınniń aıtýynsha, 2026 jyly altyn baǵasyn FRJ mólsherlemelerin tómendetedi degen kútýler qoldaýy múmkin.

– Bul jaǵdaıda jahandyq dollar álsireýi yqtımal, al dollarmen nomınatsııalanatyn shıkizat baǵalary óz pozıtsııasyn jaqsartýǵa múmkindik alady. Tehnıkalyq turǵyda joǵaryda ádemi dóńgelek maqsat – $5 000. Bul deńgeı qys aıaqtalǵanǵa deıin synalýy ǵajap emes, – dedi ol.

Sarapshynyń aıtýynsha, eshbir aktıv úzdiksiz qymbattaı bermeıdi. Onyń pikirinshe, baǵa túzetýleri táýekeli joǵary, ásirese halyqaralyq jaǵdaı túbegeıli jaqsarǵan jaǵdaıdaqalyptasady. Sonymen qatar ol altyn baǵasynyń óndirýdiń ózindik qunynan úsh eseden astam joǵarylap ketkenine de nazar aýdardy.

Aıta keteıik, búgin kúndiz de altyn baǵasynyń bir troıa ýntsııasy 4,9 myń dollardan asqany habarlanǵan bolatyn.