Altyn men kúmis: Qazaqstandyq shabandozdar Polshada qos júldeni qatar ıelendi
ASTANA. KAZINFORM - Qazaqstandyq eki sportshy Polshada ótip jatqan Wierzbna Biały Las CSI1,3* halyqaralyq týrnırinde joǵary nátıje kórsetti. Big Tour marshrýtynyń qorytyndy hattamasynda birinshi jáne ekinshi oryn aldy.
Birinshi oryndy Raısa Sokolenko Chevalier atymen jeńdi. Halyqaralyq jarys alańynda Qazaqstan Respýblıkasynyń Memlekettik Ánurany shyrqalyp, elimizdiń sportshylary marshrýt qorytyndysy boıynsha alǵashqy eki orynǵa jaıǵasty.
Marshrýt Halyqaralyq at sporty federatsııasynyń (FEI) erejelerine sáıkes bir aınalymda jyldamdyqqa oryndaldy.
Raısa Sokolenkonyń nátıjesi erekshe atap ótýge laıyq. Ol eń jaqyn qarsylasynan 5,59 sekýndqa ozyp, marshrýtty aıqyn basymdyqpen aıaqtady.
Al Oleg Sokolenko men Shenanigan turaqty ári senimdi óner kórsetti. Aıyp upaıynsyz ótken marshrýt jáne ekinshi nátıje Qazaqstanǵa halyqaralyq arenada ózindik «altyn dýbl» jasaýǵa múmkindik berdi.
Polshalyq sportshy Malgorzata Koszucka V-Querida of Vigo Z atymen marshrýtty aıyp upaıynsyz aıaqtap, 65,57 sekýnd nátıjesimen úshinshi orynǵa ıe boldy. Tórtinshi orynǵa Avstrııa ókili Christian Rhomberg ornalasty, onyń nátıjesi - 65,59 sekýnd.
Jalpy, 15 sporttyq juptyń tek jeteýi ǵana marshrýtty aıyp upaıynsyz aıaqtady. Qalǵan qatysýshylar 4-ten 16-ǵa deıin aıyp upaıyn aldy.
Ártúrli deńgeıdegi halyqaralyq jarystarǵa qatysý Ulttyq qurama sportshylary men sporttyq attarǵa eýropalyq marshrýttarda tájirıbe jınaqtaýǵa, sheberlikterin jetildirýge jáne maýsymnyń negizgi halyqaralyq starttaryna júıeli túrde daıyndalýǵa múmkindik beredi.
