Altyn medal alýdy kózdedim, qola medalǵa kóńilim tolmaıdy – Ekaterına Tokareva
ASTANA. KAZINFORM – Qazaqstandyq dzıýdoshy Ekaterına Tokareva Aıchı men Nagoıada (Japonııa) ótip jatqan 2026 jylǵy Azııa oıyndarynda qola medal jeńip alǵannan keıin jarystaǵy óneri, qarsylastary jáne bul júldeniń ózi úshin mańyzy týraly aıtyp berdi.
QR UOK málimetinshe, Tokareva 78 kelige deıingi salmaq dárejesinde úshinshi oryn aldy. Qola medal úshin ótken beldesýde qazaqstandyq sportshy Iran ókili Marıam Barbatty jeńdi.
– Qazir qandaı kúıde ekenimdi sózben aıtyp jetkize almaımyn. San túrli sezim boıymdy bılep tur. Medal alǵanyma qýanyshtymyn, biraq báribir altyn alǵym keldi. Ony qatty qaladym. Keıde sportshy qatty qobaljyp, ózine tym kóp jaýapkershilik artyp qoıady. Ókinishke qaraı, búgingi nátıje osyndaı boldy. Men, eń aldymen, japonııalyq sportshyǵa basa nazar aýdardym. Halyqaralyq oqý-jattyǵý jıyndarynda onymen beldeskenbiz. Ekeýmizdiń kúshimiz shamalas deýge bolady. Sondyqtan áýeli soǵan qarsy daıyndaldym. Koreıalyq sportshymen de aramyzda sheshilmegen esep bar edi. Jalpy, mundaǵy qarsylastardyń bári myqty. Eshqaısysy jeńisti ońaılyqpen bere salmaıdy. Bul salmaqta maǵan azdap kúsh-qýat jetispegen sııaqty. Jaǵdaıǵa baılanysty salmaǵym sál tómendep ketti. Búgin ózge sportshylarmen salystyrǵanda áldeqaıda jeńil boldym. Sondyqtan keı tusta tájirıbeme súıenýge týra keldi, - deıdi Ekaterına Tokareva.
Dzıýdoshy ózin jarysqa daıyndaǵan bapkerlerge, jaqyndaryna jáne jankúıerlerge alǵys aıtty.
– Shynymdy aıtsam, bul medaldi arnaǵym keletin adam kóp. Eń aldymen, jeke bapkerlerime arnaımyn. Sondaı-aq ulttyq quramanyń jattyqtyrýshylaryna erekshe alǵys aıtqym keledi. Meni daıyndaý úshin orasan zor jumys atqaryldy. Qarsylastarymdy jan-jaqty zerttep, árqaısysymen ótetin beldesýge jeke daıyndaldyq. Árıne, medaldi ata-anama jáne jaqyndaryma da arnaımyn. Oqý-jattyǵý jıyndarynda júrgende olar meni uzaq ýaqyt kórmeı qalady. Eń aldymen, solardyń úmitin aqtaý úshin eńbek etip júrmin. Sondaı-aq jigitime de arnaımyn. Ol da meni uzaq ýaqyt kórmeıdi, bárine shydap júr. Nátıjeme keler bolsam, qola medalǵa kóńilim tolmaıdy. Altyn alǵym keldi, ony qatty qaladym. Sondyqtan júz paıyz qýanyshtymyn dep aıta almaımyn. Budan da jaqsy óner kórsete alar edim. Degenmen búgin budan artyq nátıje kórsetý qolymnan kelmes te edi. Qazirgi múmkindigimniń shegi osy boldy. Áli de beldesýden keıingi áserden tolyq aryla qoıǵan joqpyn. Sondyqtan ázirge oıymdy jınaqtap, sóz sóıleý qıyn. Maǵan jankúıer bolǵan barsha adamǵa alǵys aıtamyn. Bapkerlerime, tálimgerlerime, jankúıerlerge jáne búkil Qazaqstanǵa raqmet! Bul - bárimizge ortaq jetistik. Endeshe, qýanyshymyzdy birge bóliseıik. Men úshin bul medal, eń aldymen, atqarylǵan eńbektiń nátıjesi. Qazir qol jetkizgen jetistigime tolyq qanaǵattanatyndaı deńgeıge jetken joqpyn. Eger altyn medal alǵanda, «Iá, jaradym, bul shynymen de úlken jetistik» der edim. Alǵa qoıǵan maqsattarym men armanym áli de kóp. Keıde solardyń bárin oryndaý da qıynǵa soǵady. Keıde ózime ózim kedergi keltirip, ishki oılarymmen arpalysyp ketetinimniń bir sebebi de osy shyǵar. Úzdik bolýǵa degen shekten tys umtylysym áli basylǵan joq. Bul medal maǵan jiger berip, budan da bıik belesterdi baǵyndyrýyma serpin bolady dep senemin, - dedi sportshy.
Elmıra Syzdyqova kúresten Azıadanyń kúmis júldesin ıelengenin jazǵan edik.
