Altyn medal alyp, halqymdy qýantqym keldi — Aıdos Sultanǵalı
ASTANA. KAZINFORM — Grek-rım kúresinen álem chempıony Aıdos Sultanǵalı altyn medal jeńip alǵanda qandaı sezimde bolǵanyn bólisti. Sportshy osy tarıhı jeńis úshin baryn salǵanyn aıtty.
— Osy tarıhı sáttiń maǵan buıyrǵanyna qatty qýanyshtymyn. Bul jeńis bizdiń kúres túriniń alǵa qaraı damýyna jańa serpin berýge úlken múmkindik bolady dep oılaımyn. Osy múmkindikti jiberip alýǵa bolmaıtynyn sezdim, sol úshin barymdy saldym. Tek alǵa júrip, halqymdy qýantqym keldi. Qulaq syndy, qabaq jaryldy. Biraq, maqsatym altyn medal jeńip alý boldy, — dedi ol.
Sonymen qatar, Aıdos jeńisti ne úshin salqyn qandylyqpen qabyldaǵanyn túsindirdi.
— Meniń oıymsha, boz kilemde sekirip qýanyshty toılaý er adamǵa laıyqty emes degen ustanym boldy. Sol sebepti, barynsha laıyqty emotsııa kórsettim, — deıdi sportshy.
Dańqty sportshy sóz sońynda komanda múshelerine jáne bapkerler quramyna óz alǵysyn aıtty.
Osyǵan deıin habarlaǵanymyzdaı, Aıdos Sultanǵalı Qazaqstan tarıhynda grek-rım kúresinen 26 jyldan keıin álem chempıonatynda altyn aldy.
Sondaı-aq, elorda turǵyndary álem chempıonyn Astana áýejaıynda saltanatty túrde qarsy aldy.