Altyn kontrabandasy: tórt óńirde 50-den astam adam ustaldy
ASTANA. KAZINFORM – Jambyl oblysynda polıtsııa departamenti uıymdasqan qylmysqa qylmysqa qarsy kúres basqarmasynyń qyzmetkerleri prokýratýramen birlesip, «Aqbaqaı» ken ornynda áreket etken uıymdasqan qylmystyq toptyń qyzmetin toqtatty.
Qazaqstan ekonomıkasynyń strategııalyq aktıvteriniń biri baǵaly metaldardyń kóleńkeli aınalymyna qatysty qylmystyq shemalardy áshkereleý boıynsha Іshki ister mınıstrligi keshendi jumys istep jatyr.
Ásirese altyndy zańsyz óndirý, óńdeý oryndaryn anyqtaýǵa jáne ony shetelge tasymaldaý baǵyttaryn belgileýge erekshe nazar aýdarylyp otyr.
Buǵan deıin ІІM tórt óńirde ken óndirýmen aınalysqan birneshe kompanııanyń zańsyz qyzmetiniń joly kesilgeni týraly habarlaǵan.
— Bıyl maýsym aıynda Jambyl oblysynda polıtsııa departamenti uıymdasqan qylmysqa qylmysqa qarsy kúres basqarmasynyń qyzmetkerleri prokýratýramen birlesip, «Aqbaqaı» ken ornynda áreket etken uıymdasqan qylmystyq toptyń qyzmetin toqtatty. Top quramyna jergilikti turǵyndar, kombınat qyzmetkerleri men qaýipsizdik qyzmetiniń ókilderi kirgen. Zańsyz óndirýden bastap óńdeýge jáne altyn quramdy shıkizatty tasymaldaýǵa deıingi qylmystyq tizbek tolyǵymen áshkerelendi. Olardyń zańǵa qaıshy áreketterinen kásiporynǵa keltirilgen zalal 400 mıllıon teńgeden asty. Top uıymdastyrýshysy men onyń sybaılastaryn ustaý bir mezgilde eldiń tórt óńirinde júrgizildi. Jalpy 50-den astam adam ustaldy. Shamamen 6 kg altyn tárkilendi, ken óńdeıtin 8 jasyryn tseh joıyldy. Qylmystyq is birneshe bap boıynsha, sonyń ishinde uıymdasqan qylmystyq top qurý, oǵan basshylyq etý jáne qatysý faktileri boıynsha tergelýde. Tergeý múddesine baılanysty ózge aqparat jarııa etilmeıdi. Altyn kontrabandasynyń arnalary, ózge de kóleńkeli aınalymdar jáne túpkilikti benefıtsıarlardy anyqtaý boıynsha jumys jalǵasyp jatyr, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
Aıta ketelik elýden asqan adamdar ınternet alaıaqtaryna jıi aldanatyny týraly jazǵan edik.