«Altyn qońyz» shynymen bedeýlikten emdep jaza ma
ASTANA. KAZINFORM — Áleýmettik jelide altyn qońyz jaıly jarnama jalaýlap tur. «Túrli dertke daýa» dep jarııalanady. Agenttik tilshisi jándikpen emdeý tásiline tereńirek úńilip kórdi.
Jarnama jasaýshylar bedeýlikti de, belsizdikti de emdeýge kepildik beripti. Búırektegi qum-tasty shaıyp shyǵatynyn jáne zár shyǵarý joldaryn tazalaıtyn qasıetin de jazǵan.
Tize berse tizim bitpeıdi. Al, «Altyn qońyzdy» alyp, aýrýynan aıyqqandar alǵysyn aıtyp, vıdeo qaldyrǵan.
Instagram-daǵy «Altyn qońyz» atty paraqshada álgi jándiktiń taýdan teriletini jazylǵan. «Al, qolda ósirilgenderiniń sapasy nashar bolady» dep «saqtandyrǵan».
Em júrgizý merzimi ekige bólinedi.
Qysqasy — 1 aı. Kúnine bir qońyzdan qabyldaıdy. Aqysy — 15 myń teńge.
Uzaǵy — 2 aı. Tıisinshe dozasy men baǵasy eki eselenedi.
Aıtpaqshy, emdelýshilermen úzdiksiz baılanys ornatyp, tegin keńes berý qyzmetin de umyt qaldyrmaǵan.
Biz baılanysyp, atalǵan altyn qońyzdy eldiń qaı bóliginen jınaıtynyn suraǵanbyz. Sondaı-aq kóp aýrýǵa em bolatynyn qaıdan bildińiz dep saýal joldadyq. Jaýap joq.
«Altyn qońyzben» emdeý — halyq emi degen soń Qazaqstannyń halyq emshileri qaýymdastyǵyna habarlastyq.
Qaýymdastyqtyń óńirlik basshysy Janbolat Sársenbaı jándiktiń jarnamasyn jýyrda estigenin, biraq jarytyp eshteńe bilmeıtinin aıtty.
«Qytaıǵa qatysy bar-aý shamasy. Áıtse de naqty paıdasy bar ma, joq pa, kesip aıta almaımyn. Iá, ata-baba dástúrinde súlik salyp, jan-janýardyń maıyn jaǵyp emdeıtin jaǵdaılar bar. Bular — ábden súzgiden ótip, zerttelgen ádister. Al, „Altyn qońyz“ múmkin birdi-ekili kisiniń atasynan balasyna jalǵasqan joly shyǵar. Alaıda, zerthanadan ótken, patenti nemese sertıfıkaty bar degendi kórgen de, estigen de emespin. Mamandar zertteýi tıis qoı», — deıdi ol.
Densaýlyq saqtaý mınıstrligine qarasty medıtsınalyq jáne farmatsevtıkalyq baqylaý komıteti de osy pikirdi qýattap otyr.
Atalǵan organnyń baspasóz hatshysy Gúldana Saýqanova «Altyn qońyzdyń» dárilik zat emes ekenin jetkizdi.
«Eger, tipti dárýmen retinde satylǵannyń ózinde aldymen saraptamadan ótýi tıis. Dárýmen retinde tirkelý kerek. Jalpy, qońyzdardy em retinde qoldaný qaýipti. Vırýstyq aýrýlar týdyrýy múmkin», — dedi baspasóz hatshysy.
Nysanaly Yǵyl
