Altyn qymbattap jatyr: Qazaqstan rezervke jınaqtaýdy jalǵastyrady

ASTANA. KAZINFORM — Eldiń altyn-valıýta rezervi turaqty ósip keledi. Bul týraly Ulttyq bank tóraǵasy Tımýr Súleımenov málim etti.

Búgin Ulttyq bankte ótken baspasóz máslıhatynda tilshiler «tamyz aıynda ortalyq bankter arasynda Qazaqstan altyn satyp alý jaǵynan iri satyp alýshy retinde tirkeldi. Endi bazalyq mólsherlermeniń ósýi aıasynda rezervke altyn satyp alý jospary ózgere me?» degen suraq qoıdy.

Óz kezeginde T.Súleımenov altyndy syrtqy jáne ishki naryqqa satý ýaqytsha tejelgenin aıtty.

- Elde óndiriletin altynnyń bárin satyp alyp, ózimizde jınaqtap jatyrmyz. Altyn – ol strategııalyq taýar. Qazirgi kezeńde altyn ınvestıtsııalyq taýarǵa aınaldy, ıaǵnı jaqsy kiris ákeledi. Bul turǵyda eldiń altyn-valıýta rezervi ósip keledi, onyń deńgeıi 57 mlrd AQSh dollaryna jetti. Jyl ishinde 28 paıyzǵa artty, - dedi UB basshysy.

Onyń sózine qaraǵanda, altynǵa qatysty Ulttyq banktiń qazirgi saıasaty álemdegi geosaıası jaǵdaı turaqtaǵansha jalǵasady.

- Túrli geoekonomıkalyq ári geosaıası protsesterge baılanysty altyn qymbattap jatyr. Osy jyldyń basynan beri 50 paıyzǵa ósti. Munyń bári altyn-valıýta rezervine ońtaıly áser etti. Ótken aıda 8 tonna satyp aldyq, al jylyna 70 tonna satyp alý jospary bar. Shamamen, 50 tonnadaı (jyl basynan) aldyq, - dedi Tımýr Súleımenov.

Eske salsaq, bıyl qazan aıynyń basynda altyn baǵasy taǵy da rekord jańartqanyn jazǵan edik.