Altyn kenishindegi apat: izdestirý-qutqarý jumystary táýlik boıy júrgizilip jatyr
«Maıqaıyńaltyn» AQ aýmaǵynda izdestirý-qutqarý jumystary táýlik boıy júrgizilip jatyr. Aýyr tehnıkanyń kómegimen ótkeldi tereńdetý jalǵasýda. Barlyǵy 37 myń tekshe metrden astam topyraq pen taý jynystary joǵaryǵa shyǵaryldy, dep habarlaıdy Kazinform.
«Jumys geoskanermen atqarylyp jatyr. Onyń kómegimen 7 qańtar kúni 5 metr tereńdikte avtobýstyń jatqan jeri shamamen anyqtaldy. Búgin topyraqty qaıta skanerleý júrgizildi, onyń nátıjeleri boıynsha izdeý-qutqarý jumystarynyń barysy túzetiletin bolady. Oqıǵa ornyna TJM, KÁAQQ RO, jergilikti atqarýshy organdar, «Maıqaıyńaltyn» AQ, polıtsııa jáne jedel járdem bólimshelerinen barlyǵy 139 adam jáne 47 tehnıka jumyldyrylǵan. Jazataıym oqıǵanyń sebebin tergeý maqsatynda QR TJM ónerkásiptik qaýipsizdik komıteti tóraǵasynyń orynbasary Musa Tanabaevtyń tóraǵalyǵymen komıssııa jumys istep jatyr. Komıssııa quramyna Pavlodar oblysy ákiminiń birinshi orynbasary Serik Batyrǵojınov, «Maıqaıyńaltyn» AQ bas dırektory Qýanysh Botın, ónerkásiptik qaýipsizdik komıteti, eńbek basqarmasy, KÁAQQ ROSh, kásipodaq uıymy departamentiniń basshylary men mamandary endi», - dep habarlady óńirlik Tótenshe jaǵdaı departamenti.
Tergeý jumysyn jan-jaqty uıymdastyrý jáne jazataıym oqıǵanyń sebebin anyqtaý úshin 4 saraptama uıymynyń ókilderi tartylǵan.
Keshe oıyqqa túsip ketken avtobýs orny shamamen tabylǵanyn habarlaǵan edik.
Eske sala keteıik, 4 qańtar kúni «Maıqaıyńaltyn» ken ornynda úlken oıyq mańyndaǵy topyraq opyrylyp, 4 adam mingen avtobýs jerdiń astyna túsip ketken bolatyn.
Keıin oqıǵa ornynan eki adamnyń denesi tabyldy.
Maıqaıyńdaǵy altyn kenishi týraly ne bilemiz?
