«Altyn qalam» ádebı baıqaýy jańa naýqanyn jarııalady
ASTANA. KAZINFORM – Bıyl qurylǵanyna 15 jyl tolyp otyrǵan «Altyn qalam» baıqaýy osy dataǵa oraı úsh jyldyq úzilisten keıin jańa maýsymyn jarııalady.
Baıqaýǵa qazaq tilinde jazylǵan jumystar qyrkúıektiń 5-nen bastap, qarashanyń 20-ne deıin qabyldanady. Oqyrmandar qarasha aıynyń 20-na deıin daýys bere alady.
Ádebı týyndylardy uıymdastyrý komıtetiniń altynqalam@yandex.kz elektrondyq poshtasyna joldaýǵa bolady.
Konkýrs jaıly tolyq málimetti júldeniń www.aqalam.kz resmı saıtynan bile alasyzdar. Saıysqa túsken barlyq shyǵarma atalǵan saıtta ornalastyrylady. Baıqaý barysynda mynadaı atalymdar boıynsha daýys beriledi:
1. Jyldyń úzdik balalar shyǵarmasy
2. Jyldyń úzdik poezııasy
3. Jyldyń úzdik prozasy
4. Jyldyń úzdik satırasy
5. Jyldyń úzdik fantastıka jáne detektıv shyǵarmasy
6. Jyldyń úzdik kınostsenarııi jáne dramatýrgııasy
Alǵashqy kezeńde shyǵarmalar www.aqalam.kz veb-saıtynda irikteledi. Oqyrmandar ózine unaǵan jumysqa daýys bere alady.
www.aqalam.kz saıtyndaǵy onlaıyn-daýys berý 3 aı boıy ótedi. Daýys berý aıaqtalǵan soń ár atalym boıynsha 6 shyǵarma tańdap alynady. Saıystyń ekinshi kezeńine oqyrmandar tarapynan eń kóp upaı jınaǵan shyǵarmalar jáne qazylar nazaryna ilingen týyndylar ótedi. Aqtyq irikteý satysynda qazylar árbir nomınatsııa boıynsha jeńimpazdardy jasyryn daýys berý arqyly anyqtaıdy. Aıta keterligi saıys barysynda shyǵarma avtorlary kórsetilmeıdi.
Aıta ketetin jaıt, qazylar quramynda qalamgerler, ádebıetshilermen qatar ózge salanyń kásibı mamandary da bar. Kóptiń talqysyna usynylǵan ádebı shyǵarmalardyń avtory kórsetilmeıdi. Mundaı talaptar júldeniń ádil ótýine kepil bola alady.
«Altyn qalam» baıqaý jumystaryna jazýshylar emes, oqyrmandar baǵa beretin Qazaqstandaǵy birinshi ádebı júlde.
