«Altyn qalam-2024» ádebı baıqaýynyń jeńimpazdary anyqtaldy
ASTANA. KAZINFORM — Almaty qalasyndaǵy Yqylas Dúkenuly atyndaǵy halyq mýzykalyq aspaptar mýzeıinde «Altyn qalam» ádebı baıqaýynyń qorytyndysy jarııalandy.
Bıyl ádebı ortada tanymal «Altyn qalam» júldesiniń bastaý alǵanyna 15 jyl tolyp otyr. Aıtýly dataǵa oraı uıymdastyrýshylar arada úsh jyl úzilisten keıin jańa maýsymyn qaıta jarııalady.
Elimizdiń jas daryndary jáne jańa esimderin qalyń jurtqa tanystyrýǵa septigin tıgizip kele jatqan «Altyn qalam» ádebı baıqaýy Nurlan Smaǵulov qorynyń qoldaýymen ótti. Sonymen qatar, jobanyń bas aqparattyq seriktesi «Rýsskoe radıo» jáne Qazaqstan baspasóz klýby, «KTK», «31 telearna», «Almaty.tv», «Meloman» saýda jelisi, «Sapaly Qazaqstan» portaly, «Qamshy.kz» aqparat agenttigi, «Massaget.kz» jastar portaly, «Aıqyn», «Jas alash» basylymdary aqparattyq qoldaý kórsetti.
— Memleket basshysy: «Kitap oqý — rýhanı kemeldenýdiń kózi. Qazirgi ýaqyt — sekýnd saıyn jańarǵan aqparat zamany. Altyn ýaqytymyzdy paıdaly isterge jumsaǵanymyz jón», — dep kópshilikti kitap oqýǵa yntalandyrý kerek ekenin sondaı-aq, qazaq tilin damytý árqashan memlekettik saıasattyń basym baǵyty bolyp qala beretinin atap ótken edi. «Altyn qalam» ádebı baıqaýy bul bastamany barynsha qoldaıdy. Sondyqtan bıyl biz qazaq tildi avtorlardyń shyǵarmalaryn kópke tanystyrýdy jón kórdik. Ónerdiń ishindegi eń bir qadirli de qasıettisi — kórkem ádebıet. Qazaq ádebıetiniń tuǵyryn bıiktete túsetin osyndaı izgi sharalar kóbeıe bersin, — deıdi ádebı baıqaýdy uıymdastyrýshylardyń biri Kenje Jumanuly.
Mereıli dataǵa tuspa-tus kelgen bıylǵy «Altyn qalam» baıqaýyna 115 avtordan 202 shyǵarma kelip túsken. Óz kezeginde oqyrmandar ózine unaǵan jumysqa onlaın túrde daýys berdi. Baıqaýda kelesi nomınatsııalar boıynsha ádebı týyndylar iriktelip, úzdik jeńimpazdar anyqtaldy:
1. Jyldyń úzdik balalar shyǵarmasy — Nurbek Nurjanuly;
2. Jyldyń úzdik poezııasy — Altynbek Mersadyq;
3. Jyldyń úzdik prozasy — Beken Ybyraıym;
4. Jyldyń úzdik satırasy — Ashat Ómirbaev;
5. Jyldyń úzdik fantastıka jáne detektıv shyǵarmasy — Baqyt Jamalıeva;
6. Jyldyń úzdik kınostsenarııi jáne dramatýrgııasy — Sharıdııar Ýálıhanov.
Baıqaý nátıjesi boıynsha uıymdastyrýshylar jeńimpaz atanǵan úzdikterdiń úzdigine estelik jáne aqshalaı syılyqtar tabystady. Jeńimpazdar arasynan 1 000 000 teńgelik bas júldeni «Ýran kenishi» atty týyndysy úshin Beken Ybyraıym ıelendi.
— Qazirgi jaǵdaıda qalamgerlerdiń shyǵarmashylyǵyn yntalandyryp, túrli týyndylardyń sapasy men deńgeıin irikteıtin osyndaı baıqaýlar mindetti túrde qajet. Bul baıqaýdyń taǵy bir ereksheligi kópshilikke belgisiz jas jazýshylardyń atyn shyǵaryp, olarǵa metarıaldyq jáne moraldyq qoldaý kórsetýinde. Sondyqtan da biz «Altyn qalam» baıqaýynyń uıymdastyrýshalary men qoldaýshylaryna alǵysymyzdy jetkizemiz, — dedi baıqaý laýreaty Beken Ybyraıym.
Buǵan qosa, jyl sońynda qatysýshylardyń úzdik ádebı shyǵarmalary jeke jınaq túrinde basylyp shyǵarylatyn bolady.
Osy oraıda sharaǵa qoldaý bildirgen Nurlan Smaǵulov qorynyń dırektory Aıdyn Sultanov kitap bul rýhanı baılyqtyń kilti ekenin aıtty.
— Kitap oqyǵan adam bilim kókjıegi keń, tili baı, mádenıetti, jan-jaqty jáne pikirin erkin jetkize alytyny belgili. Jalpy jaqsy kitap oqý ómirde jeke tulǵa bolyp qalyptasýǵa kómektesedi. Sondyqtan da biz osy baǵyttaǵy «Altyn qalam» sekildi mádenı-aǵartýshylyq bastamalardy qashanda qoldaımyz, — dedi ol.
Aıta ketý kerek, «Altyn qalam» — usynylǵan týyndylarǵa taǵaıyndalǵan qazylar emes, oqyrman qaýym ózderi tikeleı baǵa bere alatyn Qazaqstandaǵy alǵashqy ádebı júlde. Úsh aıǵa sozylǵan daýys berý qorytyndysyna saı ár atalym boıynsha alty shyǵarma tańdap alynyp, oqyrmandar tarapynan eń kóp upaı jınaǵan shyǵarmalar jáne qazylar nazaryna ilingen týyndylar saıystyń ekinshi kezeńine ótedi. Aqtyq irikteý satysynda qazylar alqasy árbir nomınatsııa boıynsha jeńimpazdardy jasyryn daýys berý arqyly anyqtaıdy. Saıys barysynda ádebı shyǵarmalardyń avtorlary kórsetilmeıdi. Qazaq ádebıetiniń búgini men bolashaǵyna beıjaı qaramaıtyn azamattar bastap uıymdastyrǵan «Altyn qalam» ádebı báıgesi 2009 jyldan beri ótkizilip keledi.
Buǵan deıin Prezıdenttik ádebı syılyqqa endi 35 jasqa deıingiler ótinish bere alatyny habarlandy.