«Altyn hanym»: Qazaqstanda myqty áıelder kóp

ASTANA. KAZINFORM – Birneshe kún buryn «Altyn hanym» baıqaýynyń jeńimpazy anyqtalǵan edi. Jobaǵa bıyl myńdaǵan áıel qatysyp, 35 myńnan astam adam daýys berdi. Halyqtyń shynaıy yqylasyna bólenip, úzdik atanǵan Samal Asanova jobadan alǵan áserimen bólisti.

– Biz kúndelikti jumysymyzdy istep jatqan kezde oqyrmandarym «Altyn hanym» baıqaýyna baryńyzshy, siz laıyqsyz» dep jazdy. Sol oqyrmandarymnyń haty arqyly óz baǵymdy synap kóreıin degen sheshimge keldim. Meniń qandaı da bir ónerim joq. Jalpy bul joba shyǵarmashylyqty synaıtyn saıys emes. Seniń qoǵamǵa qandaı paıdań, septigiń tıip jatyr, osy jaǵynan baq synaısyń. Belgili bir jetistikterge jetip, qazaqstandyq áıelderge shabyt bere alatyndaı jan jeńimpaz atanýy kerek bolǵan. Sol úshin bul joba meniń júregime jaqyn boldy. Men sol úshin ǵana qatysqym keldi. Sebebi meniń bóliserim óte kóp. Men osy joldarmen júrip ótkennen keıin, nege óz ómir jolymmen, tájirıbemmen bólisip, Qazaqstannyń áıelderine shabyt bermeske degen oıǵa keldim, – deıdi jarys jeńimpazy Jibek Joly arnasynyń «Búgin LIVE» baǵdarlamasyna bergen suhbatynda.

Baıqaýǵa qatysýǵa ótinish bildirgen 400-den astam adamnyń arasynan 26 áıel iriktelip shyqqan.

– Jobada eń basty talap – 30 jastan asqan bolýy kerek. Jáne ottan da, sýdan da ótken, ómirde qandaı da bir jetistikke, jeńiske jetken jáne sol jetistigin ózgelermen bólise alatyn oqıǵań bolýy kerek dedi. Jáne Baıan hanym arnaıy kastıng jarııalaǵan edi. Kastıngte 400-den astam oqıǵany oqyp, ózi de qatty qınalyp ketken tárizdi. Óıtkeni Qazaqstanda sondaı myqty áıelder óte kóp eken. Solardyń arasynan 26 áıeldi tańdap, iriktedi. Jáne bizdi jınap, shoý jasaıtynyn aıtyp, bizge barlyq ónerlerińizdi kórsetińizder dep talap qoıdy, – deıdi Samal Asanova.

Baıqaý jeńimpazy stýdııada ózin úzdik bolýǵa jetelegen oqıǵasymen bólisti.

– Men 0-den bastap, 5 jyldyń ishinde 600-den asa adamǵa jumys berip otyrmyn. Árıne, munyń bári úlken eńbek. Alǵashynda Aqtóbe qalasynan bastadym. Qazirgi tańda 3 qalada 50-den asa dúkenim jumys istep jatyr. Men kondıterlik ónimder daıyndap, satamyn. Men ajyrasyp, 2 jasar ulymmen Aqtóbege qaıtyp kelip otyrǵan kezim edi. Qarajat jaǵynan qınalyp júrdim. Alǵashqy tortymdy 30 jasymda pisirip, ózime sol is unap, hobbı retinde ǵana 1–2 jyl jasap júrdim. Negizi ózim "QazTeleRadıo" kompanııasynda bas maman bolyp jumys isteıtinmin. Bálish pisirý degen dúnıeni tipti túsinbeıtinmin de. Solaı jasap bastaǵan soń, sonyń qyzyǵyna túsip, 32 jasymda alǵashqy dúkenimdi ashtym. Ózim nesıe alyp, joqtan bar jasadym desem de bolady. Kishkentaı peshpen, kishkentaı mıksermen birtindep bastadym. Bul jerde qarjylyq saýattylyq asa mańyzdy. Men fızıka-matematıka salasyn bitirgenmin. Sol bilimimniń septigi tıdi. Aqshany az kezinen bastap durys qoldaný, jınaý arqyly ary qaraı ósirip otyrdym. Solaı dúkenderim de kóbeıe tústi, – deıdi kásipker.

Samal Asanova jobada jeńimpaz ataný úshin 100 paıyz daıyndyqpen kelgenin aıtady.

– Men qandaı da bir isti qolyma alsam, 100 paıyz jasamaı toqtaı almaıtyn qasıetim bar. Mende jaýapkershilik sezimi bala kezimnen óte joǵary. Árıne, ár qatysýshy ózin jeńimpaz kórip qatysady ǵoı. Sondyqtan bul júldege barlyǵy da laıyqty. Biraq men de ishteı ózime qalaı bolǵanda da bárin 100 paıyz jasaımyn degen ustanym qoıdym, – deıdi ol.

Stýdııa qonaǵy ózge qatysýshylardyń da oqıǵasy ózine qatty áser etkenin jetkizdi.

– Ár ana, ózge bir anany túsinedi. Sol jobada 25 jyl balasyn kórmegen ananyń oqıǵasy júregime aýyr tıdi. Jáne balalarynan aıyrylǵan 2 kelinshek boldy. Ol az deseńiz, joldastary da sol kezde tastap ketken eken. Naǵyz qınalǵan sátterinde eshqandaı qoldaýsyz qalyp qoıǵan áıelder qatysty. Sol oqıǵalar júregime qatty tıdi. Sebebi bala dese ár áıel túsinedi dep oılaımyn. Soǵan qaramastan, ol áıelder aıaqqa nyq turyp, jetistikke jetip otyr, – deıdi baıqaý jeńimpazy.

Kásipker osy jobadan soń óziniń de ózgelerge shabyt bere alatynyn túsingen eken.

– Meniń osy baıqaý arqyly túsingenim – men ózgelerdi de shabyttandyratyn beınematerıaldar túsire bastadym. Oǵan deıin tek qana jumys týraly vıdeo jarııalaıtynmyn. Buǵan deıin mende «Men adamdarǵa shabyt beremin be?» degen suraq bolmaǵan. Al joba barysynda bizge áleýmettik jelide belsendi bolyp, osyndaı rolıkter túsirińizder degennen keıin men áıelderdiń rýhyn kóteretin kóptegen kontentter túsirdim. Sol kezde kóp áıelderden hattar kelip jatty. Olar maǵan qınalyp, ne isterin bilmeı júrgenderin aıtyp, meniń podkastymdy kórgennen jiger alǵandaryn jetkizdi. Sol hattardy alǵannan keıin men de qaıta shabyttana bastadym. Nege taǵy da osyndaı master-klasstar, trenıngter ótkizip, óz tájirıbemmen bólispeske degen oıǵa keldim, – deıdi Samal Asanova.

«Altyn hanym» baıqaýynyń bas júldesi – Chery markaly avtokólik. Jeńimpaz bul syılyqty anasyna tabystapty.

– Bizdiń eń basty qoldaýshymyz – anamyz ǵoı. Men ata-anamyzdy árdaıym qoldap júreıik dep aıtqym keledi. Biz eshqandaı dúnıeni ana ómirge alyp ketpeımiz. Sondyqtan qasymyzda júrgen jaqyndarymyzdy baǵalaıyq. Bizdiń osylaı júrgenimiz – anamyzdyń batasynyń arqasy. Men qýanyshymdy eń áýeli anammen bóliskim keldim. Sol úshin «Altyn hanym» jobasynan jeńip alǵan kóligimdi anama syıladym. Anam qatty qýandy. Bul ol úshin úlken maqtanysh qoı. Men eń birinshi anamnyń el arasyndaǵy abyroıyn kótergim keldi. Biraq, endi anamdy kólik júrgizýge úıretýge týra keledi, – deıdi stýdııa qonaǵy.

Samal Asanova «Qazirgi qazaq áıelderi qandaı bolý kerek?» degen saýalǵa da jaýap berdi.

– Ókinishke qaraı, men ajyrasqan áıelmin. Biraq men otbasyn saqtap qalǵan áıelderdi óte qatty qurmetteımin. Qazirgi qazaq áıeli tek úı sharýasymen otyra bermeı, bilim de ala bilý kerek. Sen bilimdi bolsań, seniń osy qasıetiń balalaryńa da beriledi. Qazirgi zamanǵa laıyqty áıel – otbasy men kásibin qatar alyp júre alatyn áıel dep esepteımin, – deıdi ol.

Eske sala keteıik, búgin Mońǵolııada qoı qyrqý boıynsha ulttyq «Altyn qaıshy-2025» baıqaýy ótti.