«Altyn-Emelden» Іle-Balqash rezervatyna 30 qulan kóshirildi
ASTANA. KAZINFORM – Qulan popýlıatsııasyn saqtaý jáne onyń taralý aýmaǵyn keńeıtý maqsatynda «Altyn-Emel» memlekettik ulttyq tabıǵı parkinen Іle-Balqash memlekettik tabıǵı rezervatyna 30 qulan jiberildi, dep habarlaıdy Ekologııa jáne tabıǵı resýrstar mınıstrligi.
Janýarlardy kóshirý barysynda olardy qaýipsiz tasymaldaý jáne jańa mekendeý ortasyna beıimdeý boıynsha qajetti jumystar júrgizildi.
Aldaǵy ýaqytta mamandar qulandardyń jaǵdaıyn jáne jańa tabıǵı ortaǵa beıimdelý barysyn baqylaýda ustaıdy.
– Bul shara qulannyń tabıǵı popýlıatsııasyn qalpyna keltirýge, taralý aýmaǵyn keńeıtýge jáne elimizdiń bıoalýantúrliligin saqtaýǵa baǵyttalǵan, – delingen mınıstrlik habarlamasynda.
Qulandardy kóshirý jumystaryna Almaty oblystyq orman sharýashylyǵy jáne janýarlar dúnıesi aýmaqtyq ınspektsııasynyń, «Ohotzooprom» ÓB, «Altyn-Emel» memlekettik ulttyq tabıǵı parki jáne Іle-Balqash memlekettik tabıǵı rezervatynyń mamandary qatysty.
Aıta keteıik, «Altyn-Emel» ulttyq parkinde taýeshkiler toby fototuzaqqa tústi.
