«Altyn Emelde» Qyzyl kitapqa engen dala qyranynyń eki uıasy anyqtaldy
ASTANA. KAZINFORM — Sırek kezdesetin dala qyranynyń uıalaryna fototuzaq ornatyldy, dep habarlaıdy Orman sharýashylyǵy jáne janýarlar dúnıesi komıtetiniń baspasóz qyzmeti.
2026 jylǵy 16–17 maýsym kúnderi «Altyn Emel» memlekettik ulttyq tabıǵı parkiniń Basshı ormanshylyǵy aýmaǵynda kezekti dalalyq ǵylymı-zertteý jumystary júrgizildi.
Zertteý barysynda Qazaqstan Respýblıkasynyń Qyzyl kitabyna engizilgen dala qyranynyń (Aquila nipalensis) eki uıasy anyqtaldy. Mamandar uıalarǵa fototuzaqtar ornatyp, olardyń geografııalyq koordınattaryn belgilep, qustardyń mekendeý erekshelikterine qatysty ǵylymı baqylaý jumystaryn júrgizdi.
Park mamandarynyń aıtýynsha, atalǵan zertteýler sırek kezdesetin jyrtqysh qustardyń popýlıatsııalyq jaǵdaıyn baǵalaýǵa, taralý aımaǵyn baqylaýǵa jáne olardy qorǵaý sharalaryn jetildirýge baǵyttalǵan.
— Dala qyrany — Qazaqstannyń Qyzyl kitabyna engen sırek kezdesetin qus túrleriniń biri. Sondyqtan onyń uıalaıtyn oryndaryn anyqtaý jáne turaqty monıtorıng júrgizý bıoalýantúrlilikti saqtaý baǵytyndaǵy mańyzdy jumystardyń qataryna jatady. Ǵylymı zertteýler aldaǵy ýaqytta da jalǵasady, — delingen habarlamada.
Osyǵan deıin Ertis ormanynda sırek kezdesetin tarǵaq qusy kózge túskenin jazǵan edik.
