«Altyn-Emel» ulttyq parkinde sırek kezdesetin janýarlar fototuzaqqa túsip qaldy
ASTANA. KAZINFORM — Park aýmaǵynda ornatylǵan fototuzaqtar Qazaqstannyń Qyzyl kitabyna engen sırek kezdesetin janýarlar beınege túsip qalǵan.
«Altyn-Emel» memlekettik ulttyq tabıǵı parki tabıǵatty qorǵaý salasyndaǵy mańyzdy nátıjemen bólisti.
Atap aıtqanda, osy maýsymda fototuzaqtarǵa qar barysy men qaraquıryq (djeıran) tústi. Bul derekter atalǵan janýarlardyń park aýmaǵynda turaqty mekendeıtinin dáleldeıdi jáne olardyń saqtalýyna baǵyttalǵan sharalardyń nátıjeli ekenin kórsetedi.
— Fototuzaqtar ǵylymı zertteýlerge úlken múmkindik beredi. Olar janýarlardyń júrip ótetin baǵyttaryn, meken etý aımaqtaryn anyqtaýǵa, popýlıatsııa sanyn baǵalaýǵa jáne tıimdi qorǵaý sharalaryn ázirleýge kómektesedi.
Qar barysynyń fototuzaqqa túsýi — erekshe oqıǵa, óıtkeni bul jyrtqysh Qazaqstanda óte sırek kezdesedi. Onyń tirshilik etý aımaǵynyń naqty tirkelýi — elimizdegi bıoalýandylyqty saqtaý jolyndaǵy ilgeri qadam, — delingen habarlamada.
«Altyn-Emel» ulttyq parki aldaǵy ýaqytta da tabıǵı ekojúıeler men sırek túrlerdi qorǵaý baǵytyndaǵy jumystaryn jalǵastyra bermek.
Aıta ketelik Kólsaı kólderi ulttyq parkinde qyzyl kitapqa engen qar barysy fototuzaqqa túsip qalǵan edi.