«Altyn dán» jármeńkesinde 1000 tonnadan astam ónim satyldy
Búgin egin jınaý naýqanynyń aıaqtalýyna oraı «Altyn dán – 2023» merekesi aıasynda Qyzylorda oblysy ortalyǵynda aýyl sharýashylyǵy ónimderiniń jármeńkesi uıymdastyryldy, dep habarlaıdy Kazinform.
Qyzylorda oblysy ákimi baspasóz qyzmetiniń málimetinshe, jármeńkede barlyq aýdan men Qyzylorda qalasynyń sharýalary óz ónimderin bazar naryǵynan 15-20 paıyzǵa tómen baǵada usynǵan. Aýyldardan 425 júk kóligimen 1000 tonnadan astam ónim ákelindi.
Oblys ákimi Nurlybek Nálibaev turǵyndarmen birge jármeńkeni aralap, halyqpen sóılesti.
Syr dıqandary 286 mln teńgeniń 1020,6 tonna ónimin usynyp otyr.
Saýdaǵa 140 tonnadan astam kúrish, 25 tonna et, 30 tonnadaı balyq ónimderi, 200 tonna kartop, 80 tonna sábiz, 120 tonna pııaz, 90 tonnadan astam kókónis pen jemis-jıdekter, 200 tonna baqsha ónimderi, 115 tonna asqabaq, 6 tonnadaı sút ónimderi, 10 tonnaǵa jýyq bakaleıa jáne kondıter ónimderi, 140 bas toqty, 50 tonnadan astam jem-shóp qoıylǵan.
Aldaǵy ýaqytta «Altyn dán» merekesi barlyq aýdan men Qyzylorda qalasynda jalǵasyn taýyp, aýyl sharýashylyǵy úzdikteri marapattalatyn bolady.
