«Altyn dán – 2023»: Qyzylorda oblysynda veterınarııa uıymdaryna 30 kólik tabystaldy
Búgin Qyzylorda oblysynyń 85 jyldyǵy jáne «Altyn dán – 2023» merekesi aıasynda veterınarııa uıymdaryna 30 qyzmettik avtokólik, oblys sharýashylyqtarynda joǵarǵy kórsetkishke qol jetkizgen eńbek adamdaryna demeýshi kásiporyndar tarapynan 17 avtokólik tabystaldy.
Bul týraly Kazinform Qyzylorda oblysy ákimdiginiń baspasóz qyzmetine silteme jasap habarlaıdy.
Oblys ákimi Nurlybek Nálibaev jerlesterin aımaqtyń aıtýly merekesimen jáne dástúrli molshylyq meıramymen quttyqtady.
«Memleket basshysy Qasym-Jomart Toqaev 2021 jylǵy Qazaqstan halqyna Joldaýynda veterınarııa salasyn jetildirýge asa úlken mán berdi. Veterınarııa qyzmeti qazirgi zaman talabyna saı bolmasa, aýyl sharýashylyǵy ónimderiniń eksportyn arttyrý múmkin emes. Bul túptep kelgende aýyldaǵy aǵaıynnyń ál-aýqatyna jáne oblystyń agroónerkásip salasynyń damýyna áser etedi.
Búginde asa qaýipti 14 túrli juqpaly mal aýrýyna bólingen veterınarııalyq preparattar jetkizilip, bekitilgen josparǵa sáıkes aldyn ala egý jumystary júrgizilýde. Sapaly jumystardyń nátıjesinde Dúnıejúzilik janýarlar densaýlyǵy uıymy óńirimizge aýsyl aýrýynan taza aımaq mártebesin berdi. Epızootııalyq ahýaldy turaqtandyrý jolynda aıanbaı eńbek etetin veterınar mamandarǵa, aq kúrishten taý turǵyzǵan eńbek ozattaryna alǵys bildiremin. Jańa avtokólikter ıgilikterińizge qyzmet etsin», – dedi aımaq basshysy.
Oblysta sońǵy jyldary asa qaýipti mal aýrýlary tirkelgen joq, epızootııalyq turaqtylyq saqtaldy. Veterınarııa salasyndaǵy jumystardy ilgeriletý úshin «Jol kartasy» jasaldy. Al, uıymdardy materıaldyq-tehnıkalyq jabdyqtaý maqsatynda byltyr oblystyq bıýdjetten 73 mln teńge, bıyl 250 mln teńge bólinip, avtokólik pen qural-jabdyqtar alyndy. Salada jalpy 746 maman qyzmet atqarady.
Eńbek adamdary qurmet tórine shyǵyp, eńsesi bıikteıtin molshylyq maýsymyn asyǵa kútedi. Erte kóktemnen beri beınetten bel jazbaǵan eńbekkerler egin-terim qorytyndysymen tabysqa kenelýde. Dittegen mejege jetip, mol ónim jınaǵan ozattar qandaı da qurmetke laıyq. Osy saltanatty sharada olardyń birqatary kólik kiltin ıelendi.
Aıta keteıik, búginde barlyq salanyń materıaldyq-tehnıkalyq bazasyn nyǵaıtýǵa basymdyq berilýde. Qoǵamdyq kólik túıtkilin sheshý úshin 200 avtobýs, mektep oqýshylaryn tasymaldaýǵa 30 avtobýs, densaýlyq saqtaý salasyna 45 jedel járdem kóligi, ormanshylarǵa 470 tehnıka, quqyq qorǵaý organdaryna 92 qyzmettik avtokólik alyndy. «Úlgili eldi meken» oblystyq konkýrsynyń jeńimpazdaryna kúndelikti turmysqa eń qajetti zamanaýı úlgidegi 14 arnaıy tehnıka berildi.
