«Altyn Dala» bastamasy 2024 jylǵy The Earthshot Prize ekologııalyq syılyǵyn jeńip aldy
ASTANA. KAZINFORM - Qazaqstannyń dala ekojúıelerin qorǵaýǵa baǵyttalǵan «Altyn Dala» bastamasy 2024 jylǵy The Earthshot Prize ekologııalyq syılyǵynyń «Tabıǵatty qorǵaý jáne qalpyna keltirý» nomınatsııasynda jeńiske jetti.
QR Ekologııa jáne tabıǵı resýrastar mınıtsrligi baspasóz qyzmetiniń habarlaýynsha, bul marapat Qazaqstandaǵy kıikterdiń popýlıatsııasyn qalpyna keltirý men erekshe qorǵalatyn aımaqtaryn keńeıtý salasyndaǵy eleýli jetistikterdi moıyndady.
«Altyn Dala» bastamasy 2005 jyly Qazaqstan Respýblıkasy Ekologııa jáne tabıǵı resýrstar mınıstrligi, Qazaqstan bıoalýantúrlilikti saqtaý assotsıatsııasy (ASBK), «Fauna & Flora International» uıymy, Frankfýrt zoologııalyq qoǵamy (FZS) jáne Koroldik qustardy qorǵaý qoǵamy (RSPB) arasynda uzaq merzimdi seriktestik retinde quryldy. Seriktesterdiń negizgi maqsaty – kıikterdiń popýlıatsııasyn qalpyna keltirý jáne Qazaqstan dalalaryn saqtaý.
Qoryq aımaqtaryn qurý men keńeıtý, sırek kezdesetin túrlerdiń popýlıatsııalaryn qalpyna keltirý jáne brakonerlikke qarsy kúres boıynsha aýqymdy sharalar qolǵa alynǵan. Nátıjesinde, 2003 jyly 21 000 basty quraǵan Qazaqstandaǵy kıik popýlıatsııasy 2024 jyly 2,8 mıllıonǵa jetip, álemdegi sútqorektilerdi qalpyna keltirýdiń eń tabysty mysaldarynyń birine aınaldy.
Qazaqstan Respýblıkasy Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev: «Mınıstrlik pen seriktesterimizdiń ortaq kúsh-jigeri álemdik deńgeıde tanylǵanyna qýanyshtymyz. Bul marapat Qazaqstandaǵy tabıǵatty qorǵaý bastamalaryn keńeıtýge degen bizdiń ustanymymyzdy nyǵaıtady»,-dedi.
«Altyn Dala» bastamasynyń taǵy bir mańyzdy jetistigi – sırek jáne joıylyp bara jatqan túrlerdiń, sonyń ishinde dala búrkit, aqsuńqar jáne qulannyń popýlıatsııalaryn qalpyna keltirý boıynsha júrgizilip jatqan jumystar. Bul jumys Qazaqstannyń Ortalyq óńirindegi qoryq aımaqtarynda belsendi túrde júrgizilýde. 2024 jyly qulannyń osy óńirge qaıta ákelinýi boıynsha jobanyń sátti aıaqtalǵanyn habarlandy.
Osyǵan deıin Ertis-Baıan óńirin 21 myńnan astam kıik jaǵalap júrgendigi týraly jazdyq.
