Altyn baǵasy tómendep, qory artty

ASTANA. KAZINFORM —  Qazaqstan Ulttyq bankiniń málimetinshe, 31 shilde kúni bir gramm altyn 58 524,25 teńge turady, dep jazdy Kazinform tilshisi.

Ótken beısenbi, 24 shilde kúni, qymbat metaldyń quny shamamen 59 402 teńge bolǵan.

Dúnıejúzilik altyn keńesiniń (World Gold Council) habarlaýynsha, Qazaqstannyń altyn qory 7,4 tonnaǵa artqan. Osylaısha, eldiń rezervindegi jalpy altyn kólemi 298 tonnadan asty. Halyqaralyq valıýta qory men Eýropalyq ortalyq bankti esepke almaǵan kezde, Qazaqstan altyn qory boıynsha álemde 18-orynda tur.

Aıta keteıik, Ónerkásip jáne qurylys mınıstrligi eldiń paıdaly qazbalarmen qamtamasyz etilý merzimderi týraly jańartylǵan málimetterdi jarııalady. Sońǵy derekterge sáıkes, qazirgi óndiris kólemin eskere otyryp, Qazaqstandaǵy altyn qory 30 jylǵa jetedi.

Astanada banktik altynnyń qalaı óndiriletini týraly myna siltemeden oqyńyz.

Buǵan deıin 2025 jyldyń birinshi toqsanynda Qazaqstanda mys, nıkel, kómir, altyn jáne sırek jer metaldary bar 38 perspektıvaly ýchaske anyqtalǵany habarlanǵan bolatyn.

Dúnıejúzilik altyn keńesiniń (World Gold Council) derekterine sáıkes, 2025 jyldyń alǵashqy toqsanynda altynǵa jalpy suranys jyldyq kórsetkish boıynsha 1%-ǵa artyp, 1 206 tonnaǵa jetti — bul 2016 jyldan bergi birinshi toqsandaǵy eń joǵary kórsetkish.

Ortalyq bankter alǵashqy toqsanda 244 tonna altyn satyp alǵan — bul aldyńǵy toqsanǵa qaraǵanda az.

Sondaı-aq, altynnan jasalǵan zergerlik buıymdarǵa degen suranys rekordtyq baǵalarǵa baılanysty kúrt tómendedi: kólemi 2020 jyldan bergi eń tómen deńgeıge jetti. Alaıda, aqshalaı mánde altyn zergerlik buıymdarǵa tutynýshylyq shyǵyndar jyldyq eseppen 9%-ǵa ósip, $35 mıllıardty qurady.

Qazaqstanda Ulttyq statıstıka bıýrosynyń derekterine sáıkes, 2024 jyly altyn buıymdardyń baǵasy 8,3%-ǵa qymbattaǵan.