Altyn baǵasy rekordtyq deńgeıge jetti

ASTANA. KAZINFORM — Altyn baǵasy taǵy da rekord jańartyp, 3100 dollardan asty, dep habarlaıdy Reuters. 

Dúısenbide altynnyń baǵasy bir ýntsııa úshin 3 106,50 dollardy qurap, rekordtyq deńgeıge jetti. 

AQSh prezıdenti Donald Tramptyń tarıfterine jáne geosaıası turaqsyzdyqpen birge yqtımal ekonomıkalyq quldyraýǵa qatysty alańdaýshylyq ınvestıtsııanyń bul aktıvke jańa tolqynyna ákeldi, dep jazdy Reuters.

Altyn jyl basynan beri 18 paıyzdan astam qymbattady. Osy aıdyń basynda baǵa alǵash ret ýntsııa úshin 3 myń dollardan asty. Sarapshylar buny ekonomıkalyq turaqsyzdyq, geosaıası shıelenis pen ınflıatsııaǵa qatysty ósip kele jatqan alańdaýshylyqpen baılanystyryp otyr. 
Sonymen qatar, altyn baǵasynyń kóterilýi birqatar bankterdi óz boljamdaryn kóterýge ıtermeledi.

Goldman Sachs, Bank of America jáne UBS osy aıda altynnyń maqsatty baǵalaryn kóterdi.

Goldman boljamynsha, jyl sońyna deıin baǵa ýntsııa úshin 3300 dollarǵa jetedi, bul onyń burynǵy 3100 dollar boljamynan joǵary. Bank of America 2025 jyly ýntsııa úshin baǵa 3 063 dollar jáne 2026 jyly 3 350 dollar bolady dep boljaıdy, onyń burynǵy baǵalaýy sáıkesinshe 2 750 jáne 2 625 dollar bolǵan edi.

Tramp bılikke kelgennen beri amerıkalyq ónerkásipti qorǵaý jáne saýda tapshylyǵyn azaıtý úshin jańa tarıfterdi engizý josparlaryn alǵa tartty. 

Ol 2 sáýirde jaýap tarıfteriniń jańa paketin jarııalaıdy dep kútilip otyr, dep habarlaıdy Reuters.

Eske salaıyq, AQSh ákimshiligi elden tys jerde shyǵarylatyn barlyq kólikke 25 paıyzdyq ımporttyq baj salyǵyn engizedi. 

Altyn baǵasynyń kóterilýine ishinara «Tramp faktory» dep atalatyn sebep túrtki bolǵany buryn habarlanǵan bolatyn. Sondaı-aq asyl metaldar baǵasynyń jańa rekordy jekelegen elderdegi ishki saıası jaǵdaıǵa baılanysty.

Buǵan deıin AQSh kólik ımportyna 25% baj salyǵyn engizgenin jazǵan bolatynbyz.