Altyn baǵasy Grenlandııadaǵy jaǵdaıǵa baılanysty kúrt ósti

ASTANA. KAZINFORM – AQSh pen Eýropa arasyndaǵy shıelenis qarjy naryqtaryn dúr silkindirip, saýda soǵysy týraly áńgimelerdi qaıta jandandyrdy.

Álemdik naryqtar joǵary daıyndyq jaǵdaıynda

Eýropalyq qor naryqtary ekinshi kún qatarynan quldyraý ústinde. AQSh-ta Dow Jones ındeksi 1,7%-dan astamǵa, S&P 500 – 2%-dan astamǵa, al Nasdaq shamamen 2,4%-ǵa tómendedi.

Sársenbide Azııa-Tynyq muhıty qor naryqtary aralas dınamıkany kórsetti: Japonııa men Aýstralııadaǵy negizgi ındekster azdap tómendedi, al Gonkong pen qurlyqtyq Qytaı aktsııalary ósti.

BBC habarlaýynsha, altyn baǵasy óse túsip, psıhologııalyq turǵydan mańyzdy belgi – ýntsııasyna 4800 dollardan alǵash ret asyp tústi, sebebi baǵaly metaldar belgisizdik kezinde qaýipsiz aktıvter sanalady.

Osy aptanyń basynda altyn men kúmis baǵasy jańa rekordtyq deńgeıge jetti.

AQSh pen Eýropa arasyndaǵy saýda shıelenisi kúsheıip barady 

AQSh pen Eýropa arasyndaǵy saýda shıelenisi eki tarap ótken jyldyń shilde aıynda Shotlandııada kelisimge kelgennen keıin báseńdedi.

Osy kelisim aıasynda AQSh-tyń kóptegen eýropalyq taýarlarǵa tarıfteri Donald Tramptyń tarıfter tolqynynyń bóligi retinde bastapqyda qorqytqan 30%-dan tómen, 15% deńgeıinde belgilendi. Onyń ornyna Eýropa Qurama Shtattarǵa ınvestıtsııa salýǵa jáne amerıkalyq eksportty arttyrýy tıis dep kútilgen ózgeristerdi engizýge kelisti.

Kelisimdi rásimdeý úshin oǵan áli de Eýropalyq parlamenttiń maquldaýy qajet.

Alaıda ótken aptada Tramptyń Grenlandııany qoldaıtyn elderge AQSh tarıfterin engizý týraly málimdemesinen keıin eýropalyq parlamenttiń Halyqaralyq saýda komıtetiniń tóraǵasy Bernd Lange kelisimdi toqtata turýdan basqa amal joq ekenin málimdedi.

- AQSh konfrontatsııa emes, yntymaqtastyq jolyna oralý týraly sheshim qabyldaǵanǵa deıin jáne kez kelgen qosymsha qadamdar jasalǵanǵa deıin Ternberrıdiń eki zańnamalyq usynysy boıynsha jumysty toqtata turýdan basqa amal joq, - dep atap ótti Lange.

Ótken jyly EO Tramptyń tarıfterine jaýap retinde 93 mlrd eýro (shamamen 109 mlrd dollar) quny bar amerıkalyq taýarlarǵa tarıfter engizý múmkindigin jarııalady, biraq taraptar kelisimniń egjeı-tegjeılerin aıaqtaǵansha jospardy iske asyrýyn toqtatty.

Alaıda bul uzartý merzimi 6 aqpanda aıaqtalady, bul blok merzimdi taǵy uzartpasa nemese jańa kelisimdi maquldamasa EO tarıfteri 7 aqpanda kúshine enetinin bildiredi.

Frantsııa prezıdenti Emmanıýel Makron EO-ny májbúrlýge qarsy quraldardy qosa alǵanda, qarsy jaýap berýge shaqyryp otyrǵandar qatarynda.  

- Vashıngtonnyń jańa tarıfterdi sheksiz jınaýy «olar ásirese aýmaqtyq egemendikke qarsy tetik retinde paıdalanylǵan kezde túbegeıli qabyldanbaıdy», - dep málimdedi Makron Davostaǵy Dúnıejúzilik ekonomıkalyq forýmdaǵy sózinde.

«Tereń tynys alyp, ózińizdi erkin ustańyz»

AQSh qarjy mınıstri Skott Bessent Davosta sóılegen sózinde eýropalyq kóshbasshylarǵa jaýap sharalarǵa qarsy eskertýin qaıtalap, olardy ashyqtyq tanytýǵa shaqyrdy.

- Qapalanbaǵyzdar, Prezıdent erteń osynda bolady jáne bárin ózi túsindiredi, - dedi ol.

AQSh pen en Eýropalyq odaq bir-biriniń eń iri saýda seriktesteri: eýropalyq elderdiń málimetterinshe, taýarlar men qyzmetter saýdasy 2024 jyly 1,6 trln eýrodan (1,9 trln AQSh dollary) asyp tústi. Bul barlyq álemdik saýdanyń shamamen úshten bir bóligin quraıdy.

Buǵan deıin altyn men kúmis baǵasy jańa rekordtyq deńgeıge jetkenin jazǵan edik.